LIKISÁ, 23 JULLU 2026 – Atividade Formasaun Reforma Kurríkulu ba Klase 8 Ensinu Báziku tama ona ba loron daruak ho objetivu atu haforsa kapasidade formandu sira iha implementasaun Kurríkulu Foun.

Iha sesaun ne’e, formadór sira kontinua fó orientasaun no fasilita prátika simulasaun ba formandu sira hamutuk ho estudante sira. Diskusaun foka ba disiplina tolu: *Matemátika, Saúde no Bem-estar, no Edukasaun Fízika*.

Formadór ba disiplina Saúde no Bem-estar, Remízio António Soares, hatete katak iha loron daruak ne’e formandu sira uza kompeténsia ne’ebé sira iha hodi halo simulasaun ba estudante klase 8 nian.

_“Durante simulasaun buat hotu la’o ho di’ak, no formandu sira mós motivadu loos hakarak aprende,”_ nia dehan iha Eskola EBC São João de Brito, Munisípiu Likisá.

Iha fatin hanesan, Formadór ba disiplina Matemátika, Talsízio Francisco Salsinha Soares, espresa nia entuziazmu tanba iha formasaun ne’e akontese mudansa boot kompara ho kurrikulu anteriór.

_“Ami agradese tanba iha reforma kurrikulu ne’e bele tulun ita-nia oan sira atu aprende ho detallu liu. Esplikasaun no ezemplu sira-ne’e tau kompletu ona. Agora dezafiu ba profesór sira maka oinsá bele hato’o esplikasaun iha baze ne’e, atu estudante klase 8 bele komprende didi’ak kona-ba konseitu matéria sira,”_ nia konta tuir hafoin formasaun remata.

Formasaun loron daruak ba Reforma Kurríkulu ne’e hetan partisipasaun no akompañamentu másimu husi Xefe Departamentu Gabineti Formasaun Akadémika (GFA), Raul Vicente, Superintendente Munisípiu Likisá, Inspetór sira husi Likisá, formadór sira, formandu no estudante sira husi EBC São João de Brito Likisá.

#MediaME
#JustinoNenoQuefi