Dili, 7 Abríl – Ministériu Edukasaun liu hosi HANDS servisu hamutuk ho Inspesaun Jerál Edukasaun hala’o formasaun ba inspetór pre-eskolár kona-ba jestaun dadus no aspetu edukasaun sedu ba labarik ne’ebé hetan apoiu tékniku no orsamentu hosi Programa HANDS. HANDS iha kompromisu hodi kontinua hasa’e kapasidade ba inspetór sira atu nune’e kontinua hala’o sira-nia papél ne’ebé importante iha apoiu manorin pre-eskolár sira
Formasaun ne’e sei hala’o durante semana ida hosi loron-7 to’o 11 fulan-Abríl no hetan abertura hosi Sub-IJ, Sr.Jaime da Cruz reprezenta Inspectora Jeral konforme númeru despaxu 319, ho Jestór Seniór Programa HANDS, Sr. Augusto Ferreira Soares, iha salaun enkontru HANDS. Formasaun ne’e partisipa hosi inspetór na’in-30 hosi munisípiu 14,inklui RAEOA no Ataúro.
Tópiku ne’ebé inspetór sira sei hetan iha formasaun ida-ne’e maka revizaun ba Formatu Inspesaun Rezultadu (FOR 2025) no Formatu Inspesaun Rotina (FIR 2025); TIK ba Aprendizajen Kombinada, Literasia, Numerasia, Protesaun Labarik, Importánsia hosi Abilidade Rona, School Data Set (SDS) no Teacher Data Set (TDS).
Formasaun ne’e esensiál tebes atu nune’e inspetórsira bele uza hodi rekolla dadus pre-eskolár sira-nian, ne’ebé foku ba asesu, jestaun, no jeralmente ba kualidade edukasaun pre-eskolár. Informasaun hirak-ne’e sei ajuda Inspesaun Jerál atu hatene kona-ba impaktu atividade ne’ebé akontese iha área pre-eskolár.
Ida-ne’e mós área importante tebes ba inspetór pre-eskolár sira hodi bele suporta no halo akompañamentu ba manorin pre-eskolár sira hodi hadi’ak kualidade edukasaun no kuida ambiente eskolár sira hanesan halimar-fatin ba labarik sira.
