Viqueque - Segunda-feira, 20 Outubru 2025
Maske mosu desentendimentu sira iha eskola ligadu ho estatutu eskola nian maka Ministériu Edukasaun liuhusi Inspetór Jerál Edukasaun ne'ebé lidera husi Sub-Inspetór Jerál, núkleu, Administrasaun Eskolár Sr. Rodolfo Henrique Aparicio ho ekipa no akompaña husi Superintendente Edukasaun Munisípiu nomós Komadante Esquadra PNTL Postu Watulari hala'o mediasaun ho profesór/a, komunidade sira iha Eskola Ensinu Sekundária Jerál Filiál Daraloi-Iraler hodi realiza ezame nasionál ho hakmatek no kontroladu tanba ameasa atu interven ba ezame nasionál.
Hafoin halo mediasaun Koordenadór ba realizasaun ezame nasionál no pasajens klase nian Sr. Agostinho da Costa do Rosario hatete, realizasaun ba exame nasionál iha eskola ida-ne'e la'o ho hakmatek no kontroladu maske antes ne'e mosu dezentendimentu balun maibé hanesan Timoroan no funsionáriu públiku prontu atu koopera ho estadu hodi realiza exame nasionál ho di'ak tanba estudante maka futuru nasaun nian.
" Totál Estudante ne'ebé maka partisipa iha ezame nasionál iha Eskola Ensinu Sekundáriu Jerál Filiál Daraloi-Iraler hamutuk estudante 49 kompostu husi Siénsia teknolojia estudante hamutuk 21 no Siénsia sosiais no humanidade hamutuk estudante 28", Tenik Koordenadór Sr. Agostinho.
Responsavél ba realizasaun ezame nasionál no pasajen klase ne'e husu ba ministériu edukasaun liu-liu Diresaun Jerál ba ensinu sekundáriu nian atu bele hakbesik mai eskola ida ne'e hodi fó solusaun ba estatutu eskola ida-nian tanba laiha solusaun ba estatutu maka sei afeta ba prosesu aprendizajen iha tinan oin.
Enkuantu iha mediasaun no monitorizasaun ba realizasaun ezame nasionál ne'e hetan partisipasaun maksimu husi Inspetór Jerál Edukasaun ne'ebé lidera husi Sub-Inspetór Jerál, núkleu, Administrasaun Eskolár Sr. Rodolfo Henrique Aparicio ho ekipa no akompaña husi Superintendente Edukasaun Munisípiu nomós Komandante Eskuadra PNTL Postu Watulari, profesór/a no komunidade sira.
#JornalistaEliasdaCosta
#MÉDIAME
