Díli – Loron, Segunda-feira, 19 Agustu 2024
Sua Exelénsia Ministra Edukasaun Dra. Dulce de Jesus Soares hala’o enkontru ho estudante voluntáriu na’in 2 ho ekipa husi Australia, ne’ebé hala’o atividade siklista iha Australia ho objetivu atu buka fundu angariasaun hodi halo konstrusaun ba sala aula no fasilidade eskola nian eskola iha Timor-Leste.
Iha enkontru ne’e, Estudante Voluntáriu Australianu, Leo Norman hateten, projetu siklajen ne’e, tuir dalan haree natureza sira, liuliu manu hodi halo dokumentasaun no mós ko’alia ho komunidade sira iha Australia kona-ba Timor-Leste, liuliu kona-ba edukasaun, nune’e parte husi projetu ne’ebé halo, mak atu rekolla fundus angariasaun hodi ajuda fali halo konstrusaun eskola iha Timor-Leste.
“Projetu ida ne’e estraiñu oituan ho bisikleta hale’u Australia no tuir dalan ami buka manu sira ne’ebé iha dalan, hodi rekolla fundu husi projetu ne’e, no kapás tebes atu fó apoiu ba Timor-Leste ida ne’ebé besik liu Australia no espera bele apoiu projetu SPEND IT WELL hodi hadi’a oportunidade asesu ba edukasaun iha komunidade sira.
Estudante voluntáriu ne’e hatutan, impaktu ne’ebé hanoin atu fó ba Timor ida ne’e kapás tebes, tanba konsege rekolla fundus angariasaun besik rihun 60 no orsamentu ida ne’e bele fó influénsia ba nesesidade edukasaun ba labarik sira iha futuru.
Estudante voluntáriu na’in 2 husi Australia ne’e mak Leo Norman no Cezary Carmichael, tau hamutuk fundu angariasaun ne’ebé hetan husi projetu siklista ho organizasaun SPEND IT WELL hodi halo konstrusaun Eskola Ensinu Báziku ida iha postu administrativu Balibó.
#MédiaME
