Dili, 26 Maiu 2025 – Ministériu Edukasaun, liuhusi Inspesaun Jerál, halo formasaun literasia bázika ba Inspetór Pré-Eskolár, Ensinu Báziku no Ensinu Sekundáriu Jerál no Tékniku Vokasionál husi Territóriu Timor-Laran tomak, hamutuk na’in 59, iha Salaun Ian Martin INFORDEPE Matadoru.

Iha abertura ba formasaun ne’e, Sua Exelénsia Ministra Edukasaun Dra. Dulce de Jesus Soares, hateten, objetivu husi formasaun ne’e mak atu mellora liután Inspetór sira-nia koñesimentu iha área aprendizajen nian, nune’e ba halo monitorizasaun iha eskola sira, inspetór sira mós presiza kompriende kona-ba konteudu kurríkular.

“Ministériu Edukasaun tau prioridade boot ba literasia bázika ka literasia fundasionál, hanesan prioridade ida husi Governu Konstitusionál Da-9 nian, atu garante katak, estudante hotu-hotu husi nível ensinu báziku, pelumenus iha nível literasia di’ak”, dehan Ministra Edukasaun.

Governante ne’e hatutan, Inspetór Eskolár sira, presiza aumenta tán sira-nia responsabilidade no koñesimentu ba literasia no numerasia ne’e rasik, atu bele ajuda profesór sira hanorin ho di’ak, liuhusi supervizaun ne’ebé kada loron halo iha eskola sira.

#MédiaME