Dili – Loron Tersa-feira, 25 Marsu 2025
Konkorente husi bolsa kandidatu ba Ensinu Sekundáriu Jerál no Ensinu Sekundáriu Tékniku Vokasionál, orgullu no agradese ba Ministériu Edukasaun, ne’ebé lidera husi Sua Exelénsia Ministra Edukasaun, Dra. Dulce de Jesus Soares no Sua Exelénsia Sekretáriu Estadu ESG no ESTV Sr. Domingos Lopes Lemos, tanba bele fó oportunidade ba graduadu foun sira husi universidade no institutu superiór sira iha territóriu Timor laran tomak, liuhusi vagatura ba bolsa kandidatu atu sai manorin. Lia hirak ne’e hato’o, bainhira konkorente sira konkore hela vagatura ba bolsa kandidatu iha INFORDEPE Matadoru.
Iha entrevista, konkorente, Tália dos Santos Bria Soares Magalhães, hateten, hanesan Timor oan apresia ho Governu liuhusi Ministériu Edukasaun, ne'ebé utiliza sistema ida la hanesan ho sistema uluk ne'ebé ita hotu hatene katak prejudika ona ba joven barak ne'ebé remata ona estudu iha Universidade no hamate sira-nia kareira servisu nian no aumenta dezempregu ba iha nasaun, tanba la haree ba nível edukasaun, nune'e sistema ida agora ne'e di'ak tebes tanba ema hotu-hotu bele asesu tuir rekezitu ne'ebé fó sai ona.
“Ha'u sente orgullu tebes, tanba bele sai mós kandidatura iha konkursu públiku ne'ebé realiza husi Ministériu Edukasaun hodi bele fó oportunidade ba joven sira ne'ebé foin remata estudu iha Universidade atu bele konkore iha vaga ida ne'e”, dehan Tália.
Iha fatin hanesan, konkorente ho naran Vidál Maumeta, hateten, polítika Ministériu Edukasaun liu husi Nonu Governu Konstitusionál ne'ebé loke konkursu bolsa kandidatu ba profesores Ensinu Sekundáriu Jerál no Ensinu Tékniku Vokasionál ne'e hanesan parte di'ak ida, tanba Ministériu fo oportunidade konkursu públiku ba ema hotu hodi bele aplika ba vaga ida ne'e.
“Orgullu tebes ho Ministériu Edukasaun ne'ebé implementa sistema ida di'ak kompara ho sistema antigu ne'ebé mak bolu de'it ka voluntáriu. Maibé ita rekoñese duni katak sistema ida agora ne'e di'ak tebes, tanba fó biban ba ema hotu hodi aplika, nune'e laiha deskriminasaun”, dehan konkorente Vidál.
#MédiaME
