𝙈𝙄𝙉𝙄𝙎𝙏É𝙍𝙄𝙐 𝙀𝘿𝙐𝙆𝘼𝙎𝘼𝙐𝙉 𝙎𝙀𝙉𝙎𝙄𝘽𝙄𝙇𝙄𝙕𝘼 𝙄𝙂𝙐𝘼𝙇𝙄𝘿𝘼𝘿𝙀 𝙅É𝙉𝙀𝙍𝙐, 𝙋𝙍𝙀𝙑𝙀𝙉𝙎𝘼𝙐𝙉 𝙑𝙄𝙊𝙇É𝙉𝙎𝙄𝘼 𝘽𝘼𝙕𝙀𝙄𝘼 𝘽𝘼 𝙅É𝙉𝙀𝙍𝙐 𝙉𝙊 𝙎𝘼Ú𝘿𝙀 𝙍𝙀𝙋𝙍𝙊𝘿𝙐𝙏𝙄𝙑𝘼 𝘽𝘼 𝙀𝙎𝙏𝙐𝘿𝘼𝙉𝙏𝙀 𝙎𝙄𝙍𝘼

Ermera, 14 de Abril 2025 - Ekipa Diresaun Nasionál Planu Orsamentu no Estatístika husi Ministériu Edukasaun, halo abertura ba formasaun ho tema, "Sensibilizasaun kona-ba Igualidade Jéneru no Prevensaun Violénsia bazeia ba jéneru no Saúde Reprodutiva" ba estudante sira, iha Eskola Sekundáriu Jerál Nino Conis Santana Gleno, Munisípiu Ermera.

Iha abertura ne'e, Xefe Departementu Inkluzaun no Edukasaun, Sra. Rita Fransisca da Crus Gomes hatete, Sensibilizasaun kona-ba Violénsia bazeia ba Jéneru ne'e ko'alia liu kona-ba direitu feto no mane nian atu bele sente seguru iha ambiente eskola no haree kona-ba oinsá estudante sira uza infraestutura iha eskola ne'e rasik ho dignu no konfortável, nune’e sira bele tuir prosesu aprendizajen no simu matéria ho seguru.

"Formasaun ne'e la'o durante loron tomak, tarjetu ba manorin no kanorin sira iha eskola ESG Nino Conis Santana, tanba eskola ne'e maka númeru aas tebes iha Munisípiu Ermera no ida ne'e sai prioridade atu bele hatene kona-ba Violénsia Bazeia ba Jéneru iha eskola ne'e rasik no kontinua implementa kontinuasaun iha prosesu aprendizajen", dehan Xefe Departementu Ikluzaun Sra. Rita Fransisca Gomes Fernandes.

Iha fatin hanesan, Adjunta Diretór ESG Nino Conis Santana, hateten, apresia tebes ba Ministériu Edukasaun, tanba bele realiza formasaun ida ne'e hodi bele hasa'e profesór no estudante sira-nia koñesimentu kona-ba oinsá bele respeita malu iha eskola, iha sosiedade no mós iha fatin ne'ebé de'it sira iha.

"Programa formasaun ida ne'e involve ami hotu, tantu profesór no estudante sira hotu iha Eskola ESG Nino Conis Santana, ami bele aproveta iha loron tomak ida ohin no bele haforsa ami hodi aprende buat ne'ebé mak formadór sira fahe mai ami", dehan Adjunta Diretór.

Aleinde ne'e Estudante, Fransisco Soares, hateten, hanesan estudante presiza hatene kona-ba formasaun sira kona-ba Violénsa Bazeia ba Jéneru hodi bele hakle'an koñesementu, tanba hanorin kona-ba oinsá atu respeita no hadomi malu iha eskola no iha sosiedade, liuliu bele muda belun mane no feto sira ne'ebé maka hanoin negativu ba hahalok ne'ebé maka di'ak.

"Hanesan estudante agradese no orgullu tebes ba programa sira ne'ebé ami hetan ona iha Eskola Sekundáriu Jeral Nino Conis Santana, tanba hetan tán ona matéria foun kona-ba oinsá respeita malu entre feto no mane inklui respeita inan-aman no ema hotu iha sosiedade", dehan estudante Fransisco Soares.

#MédiaME