𝙈𝙀 𝙃𝘼𝙈𝙐𝙏𝙐𝙆 𝙃𝙊 𝙆𝙊𝙄𝘾𝘼, 𝙎𝙀𝙄 𝙃𝘼𝙍𝙄𝙄 𝙋𝙍É-𝙀𝙎𝙆𝙊𝙇Á𝙍 𝙃𝘼𝙈𝙐𝙏𝙐𝙆 34 𝙄𝙃𝘼 𝙈𝙐𝙉𝙄𝙎Í𝙋𝙄𝙐 𝘽𝘼𝙐𝘾𝘼𝙐 𝙉𝙊 𝘽𝙊𝘽𝙊𝙉𝘼𝙍𝙐

Díli – Loron Sexta-feira, 04 Abril 2025
Ministériu Edukasaun hamutuk ho ajénsia KOICA - Governu Korea, liuhusi Ministériu Finansas, halo asinatura akordu ida ho orsamentu 6 miloens hodi harii Pré-Eskolár iha Munisípiu Baucau no Bobonaru durante tinan 5 nia laran. Serimónia asinatura akordu ne’e realiza iha Auditoriu Kay Rala Xanana Gusmão, Ministériu Finansas, Aitarak-Laran.

Iha asinatura ne’e, Sua Exelénsia Ministra Edukasaun Dra. Dulce de Jesus Soares, hateten, husi orsamentu 6 miloens ne’e sei foka mós ba programa pré-eskolár iha Munisípiu Bobonaru no Baucau, tanba munisípiu rua ne’e, tuir sensus hatudu katak, taxa partisipasaun estudante pré-eskolár husi tinan 3 to’o 5 sei menus.

“Orsamentu ne’e sei harii mós edifísiu eskola pré-eskolár hamutuk 34 ho totál sala aula neen-nulu resin, inklui mós komponente formasaun ba profesór no mós formasaun ba inan-aman sira, nune’e inan-aman sira iha konsiénsia hodi haruka oan sira ba fasilidade pré-eskolár sira”, dehan S.E. Ministra Edukasaun.

Governante ne’e hatutan, projetu ne’e asina ohin, tanba ne’e fulan oin hahú ona implementasaun, tanba sei rezolve papelada sira entre Ministériu Edukasaun, Ministériu Finansas, inklui mós KOICA no UNICEF, tanba orsamentu ne’e kanaliza liuhusi UNICEF.

#MédiaME