Dili, 12 Abril 2025 - Ministériu Edukasaun lakon tan nia manorin-na'in di'ak ida ne'ebé konsidera hanesan eroi ba edukasaun, tanba tinan barak nia laran, dedika nia-an iha setór edukasaun liuhusi hanorin no eduka estudante sira, iha Eskola Esperança da Pátria Becora Dili.
Maktoban hahú nia kna'ar hanesan manorin-na'in iha Eskola Esperança da Pátria, Becora, durante tinan barak nia laran no hetan konfiansa hodi asume responsabilidade hanesan Diretór, iha Eskola refere to’o hakotu iis, iha loron 11 fulan abril, tinan 2025, iha ninia rezidénsia Becora.
Ho nune'e, Sua Exelénsia Ministra Edukasaun Dra. Dulce de Jesus Soares hamutuk ho dirijente sira, presta omenajen ikus ba maktoban João da Silva Pereira nu'udar rekoñesimentu ida ba nia dedikasaun tomak hodi kontribui ba setór edukasaun iha Timor-Leste.
Maktoban João da Silva Pereira, moris iha loron 20 fulan agostu, tinan 1971 no hakotu nia peregrinasaun iha mundu, iha loron 11 fulan abril, tinan 2025.
#MédiaME
