𝙈𝙀 𝙃𝘼𝙇𝙊 𝘼𝘽𝙀𝙍𝙏𝙐𝙍𝘼 𝘽𝘼 𝙁𝙊𝙍𝙈𝘼𝙎𝘼𝙐𝙉 𝙀𝙎𝙋𝙀𝙎𝙄𝘼𝙇𝙄𝙕𝘼𝘿𝘼 𝘽𝘼 𝘿𝙄𝙍𝙀𝙅𝙀𝙉𝙏𝙀 𝙀𝙎𝙆𝙊𝙇Á𝙍 𝙄𝙃𝘼 𝙈𝙐𝙉𝙄𝙎Í𝙋𝙄𝙐 𝙇𝙄𝙌𝙐𝙄ÇÁ

Liquiçá, 17 Marsu 2025

Sua Exelénsia Ministra Edukasaun Dra. Dulce de Jesus Soares ho Prezidente INFORDEPE Sr. Domingos Martins no akompaña husi Sekretáriu Munisipal no Diretór Edukasaun Munisipal halo abertura ba formasaun espesializada ba dirijente eskola sira iha Eskola Ensinu Sekundáriu Jerál Hu Iso Lara Iso Munisípiu Liquiçá.

Hafoin remata Sua Exelénsia Ministra Edukasaun Dra. Dulce de Jesus Soares hateten, ohin halo formasaun ba dirijente eskola sira ho objetivu importante ba formasaun ne’e maka atu garante funsionamentu di'ak iha eskola.

“ Lider eskola ida presiza iha preparasaun di’ak tanba lider eskola ida la’os de’it atu jere ho sira-nia kompeténsia de’it maibe presiza iha vizaun, misaun no kriatividade nune’e bele halo eskola ida funsiona ho di’ak”, Dehan S.E. Ministra.

Governante ne’e akresenta, Materia ne’ebé sei fó durante formasaun maka administrasaun no jestaun eskolár, traballu autónomu no Avaliasaun maibé inklui mós materia Kuríkulu, Fraternidade Umana, Jestaun Finanseira, Jestaun Administrasaun no lideransa.

“Ita hakarak liuhusi formasaun ne’e formandu sira bele hetan informasaun ne’ebé di’ak atu ajuda sira hodi lidera eskola ne’e ho diak tanba formasaun ne’e ho pakote ne’ebé kompletu hodi hatan ba nesesidade dirijente sira nian”, Ténik S.E. Ministra

Enkuantu iha abertura ba formasaun ne’e, Sua Exelénsia Ministra Edukasaun ho komitiva halo observasaun ba estudante sira ne’ebé hala’o prátika ba siénsia iha eskola ne’e no mós hala’o vizita ba eskola CAFE Liquiçá.

#MédiaME