Díli, 25 Setembru 2025
Sua Exelénsia Ministra Edukasaun, Dra. Dulce de Jesus Soares, hamutuk ho Reverendíssimo D. Norberto do Amaral, Presidente da Konferénsia Episcopal Timorense, Sua Eminénsia Dom Virgilio Cardeal do Carmo da Silva, SDB, Dom Leandro Maria Alves, Presidente Executivo da Comissão Nacional da Educação Católica de Timor-Leste (CONECTIL), Rev. Pe. António Quenser, halo lansamentu ofisiál ba manuál Alunu ba 8.º no 11.º anu, iha Salaun ISFIT Fatumeta.
Iha diskursu, Sua Exelénsia Ministra Edukasaun, Dra. Dulce de Jesus Soares, hateten, onra no sentidu responsabilidade boot ne'ebé hasoru iha okaziaun importante ida-ne'e mak lansamentu ofisiál Manuál Alunu ba 8.º no 11.º anu. Dixiplina Edukasaun no Relijiaun Morál hala'o papél fundamentál ida iha formasaun labarik no joven timoroan sira, ajuda sira atu komprende di'ak liu tan Signifikasaun moris nian, importánsia dignidade umana, justisa, solidariedade no respeitu.
“Manuál hirak-ne'e halo riku profesór sira-nia servisu, fó apoiu estruturadu no atualizadu ba sira, enkuantu oferese matadalan aprendizajen ida-ne'ebé klaru, asesível no konsistente ba estudante sira ho ita-nia identidade kulturál no espirituál no mós ezemplu ida kona-ba oinsá kolaborasaun entre Estadu, Igreja no sosiedade bele fó rezultadu ba nafatin hodi harii futuru ida-ne'ebé justu no umanu”, dehan S. E. Ministra Edukasaun.
Governante ne’e hatutan, Edukasaun iha Timor-Leste tenke inkluzivu, kualidade no promove valór sira ne'ebé hametin sidadania, pás no unidade nasionál. Manuál sira-ne'e la'ós de'it livru eskola, maibé parseiru moris nian, instrumentu ida-ne'ebé ajuda atu sai ema integradu, responsavel no kompromitidu. Tanba ne’e, kompromisu Ministériu Edukasaun nian atu kontinua apoia inisiativa hirak-ne'e, ne'ebé halo ita-nia sistema edukasaun sai riku no kontribui ba formasaun sidadaun Timor-oan sira.
Iha fatin hanesan, Prezidente Ezekutivu Comissão Nacional da Educação Católica de Timor-Leste (CONECTIL), Rev. Pe. António Quenser, hateten, Edukasaun Morál no Relijiaun Katólika, hola papél fundamentál iha edukasaun karakter umana no relijioza, inklui hola papél fundamentál iha konstrusaun valór iha indivídu no sosiedade timorense.
“Edukasaun Morál no Relijiaun orienta indivídu no sosiedade ba buat ne’ebé loos no sala, promove étika, empatia no respeitu ba ema seluk, hodi kuda mós baze espirituál ba fiar nian. Relijiaun hamorin importánsia husi valór domin iha kompaixaun no perdaun, ne’ebé aprende liuhosi doutrina, istória, ritual no interasaun sosiál iha eskola no mós iha ambiente relijiozu sira”, dehan Rev. Pe. António Quenser.
Prezidente Ezekutivu CONECTIL ne’e hatutan, ohin lansa manuál ba alunu 8 anu no 11 anu, ida ne’e hanesan rekursu didátiku ba siklu datoluk ensinu báziku no ensinu sekundáriu nian no ida ne’ebé sai hanesan TPC ba CONECTIL mak rekursu didátiku ba ensinu pré-eskolar no ensinu báziku siklu ida no daruak, ne’ebé tuir planu sei hahú revizaun iha tinan oin.
CONECTIL hanesan orgaun ezekutivu ida husi Konferénsia Episkopál Timorense, ne’ebé hola responsabilidade husi 2005 ho naran Komisaun Katekétika Interdiosezana hafoin muda ba Sinerse no iha 2013 nakfilak ba CONECTIL hodi servisu maka’as no estabelese kurríkulu ida hodi hanorin no forma Timoroan sira, hahú kedas ho programa kurrikulár gia profesór no manuál alunu, inklui materiál didátiku.
#jornalistaluisalmeida
#MédiaME
