Díli, Kuarta-feira, 28 Maiu 2025 - Instituto Nacional Formação de Docentes e Profissionais da Educação (INFORDEPE), simu vizita ofisiál husi reprezentante Falintil-Força Defesa Timor-Leste (F-FDTL), iha edifísiu HANDS, Matadouru, Dili.

Vizita ne’e ho objetivu atu hatene no komprende modelu formasaun ba profesór sira, dezafiu sira ne’ebé INFORDEPE enfrenta, no progresu ne’ebé alkansa tiha ona.

Iha enkontru ne’e, Prezidente INFORDEPE, Mestre Domingos Martins, hatete, INFORDEPE nia misaun mak fó formasaun kontínua no formasaun espesializada ba profesór sira no profisionál edukasaun sira iha Timor-Leste.
“Ita serbisu loron-loron hodi assegura profesór sira iha nasaun Timor-Leste prepara di'ak atu hasoru dezafiu edukasaun ho kualidade no inkluzaun, foka ba valorizasaun identidade linguístika no kulturál,” hateten Mestre Domingos.

Nia subliña tan, kolaborasaun ne’e hatudu espíritu envolvimentu no prova klaru kona-ba kompromisu atu valoriza lian portugés nu’udar prioridade, ne’ebé envolve setór sira seluk hanesan edukasaun no defeza. Nia dehan, setór rua ne’e la’ós kontraditóriu, maibé komplementár, tanba hotu-hotu iha misaun ida de’it: serbi ho rigor, dixiplina, no estratéjia ba futuru komun.

Delegasaun F-FDTL, ne’ebé lidera husi Tenente-Coronel Infantaria Bruno Miguel Fernandes Gaspar Mendes, hateten, vizita INFORDEPE nu’udar parte husi esforsu atu komprende funsaun estratéjiku ne’ebé sustenta sistema edukasaun. Delegasaun nian fó atensaun ba aspetu sira hanesan modelu formasaun ba profesór sira, dezafiu, progresu, dadus estatístiku, sistema monitorizasaun no avaliasaun, peskiza sientífika no relatóriu temátiku sira.

Vizita ida ne’e hatudu relevánsia dialogu entre instituisaun sivíl no setór defeza, no reforsa kooperasaun interinstitusionál bazeia ba evidénsia. INFORDEPE kontinua prontu atu partilha kapasidade no asesu ba informasaun atu sustenta misaun komun: dezenvolve lideransa no orienta futuru edukasaun iha Timor-Leste.

#MédiaME-JornalistaEmilio