Díli, loron 29 fulan setembru 2025
Ministériu Edukasaun liuhosi Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho Prezidente Interinu Komisaun Funsaun Públika Sr. José Telo Soares Cristovão fó pose ba manorin-na’in 178 rekrutadu husi faze dalima bolsa kandidatura Ensinu Báziku.
Iha diskursu Sua Exelénsia Sekretáriu Estadu ESJ-ESTV Sr. Domingos Lopes Lemos hateten, pose profesór ba karreira dosente ida-ne’e espesiál, ne'ebé reprezenta kapítulu foun ida iha vida profisionál, no promete katak sei halo dezenvolvimentu edukasaun iha Ensinu Báziku sira.
"Momentu selebrasaun ida-ne'e mak rekoñesimentu husi Ministériu Edukasaun ba profesór sira ne'ebé, mai hamutuk ona iha sistema ensinu nian. Ne'e posibilidade importante tebes, tanba marka kontinuasaun ba karreira profesór sira nian ne'ebé dedika ona hanesan profesór. Ita iha responsabilidade atu kria ambiente aprendizajen ida-ne'ebé seguru, inkluzivu no estimulante, ne'ebé respeitu malu no dezeja ba koñesimentu ida di'ak liu no sai boot iha ita-nia estudante sira".
Governante ne’e dehan, bainhira tama nu'udar funsionáriu públiku husi edukasaun, ida-ne'e importante tebes atu rekoñese importánsia kolaborasaun nian. Ministériu Edukasaun, fiar katak emposadu no emposada sira sei hala’o knaar sira ho profisionalizmu no dedikasaun másimu. Ministériu Edukasaun apoia viajen no sei servisu hamutuk atu kria ambiente aprendizajen ida-ne’ebé di’ak ba kreximentu no dezenvolvimentu husi estudante hotu-hotu.
Iha fatin hanesan, Prezidente Interinu Komisaun Funsaun Públika, Sr. José Telo Soares Cristovão dehan, emposadu no emposada sira sei halo papél fundamentu iha baze hodi eduka estudante sira atu sai lideransa di'ak iha Futuru, ida-ne’e hanesan naha todan ne'ebé emposadu sira tau hela iha kabaas leten.
"Dedika ita-boot sira nian-an hosi luta hodi hanorin ba oan sira hodi kontribui ba edukasaun ne'ebé ho kualidade, kualidade edukasaun ne'e mai husi manorin-na’in sira", dehan Prezidente Interinu CFP.
Emposadu no emposada na'in 178 kompostu husi Munisípiu Aileu na'in 6, Ainaro 10, Baucau 13, Bobonaro 15, Covalima 23, Díli 23, Ermera 26, Lautem 26, Liquiça 15, Manatuto 5, Manufahi 11, RAEOA 5 no Viqueque 20.
#jornalistamario
#jornalistaeurico
#jornalistarita
#MédiaME
