Dili, 29 Abril 2025 — Ministra Edukasaun, Dra. Dulce de Jesus Soares, partisipa iha serimónia entrega Projetu Reabilitasaun Sala Leitura Xanana Gusmão, ne’ebé implementa liuhusi assisténsia finanseira ba projetu kulturál iha baze, husi Governu Japaun. Projetu ida ne’e mak kontribui ba reabilitasaun fasilidade sira hanesan Uma-Mahon, Biblioteka, Sentru Exibisaun, Pavimentu, Parede Liur no Moru Protesaun, ho total fundu 68.324.00 U$D.
Iha serimónia entrega, Embaixadór Japaun iha Timor-Leste, Sr. Tetsuya Kimura, hateten, kontente tebes bele envolve iha projetu ida-ne’e ne’ebé fó kontribuisaun ba promosaun edukasaun no valorizasaun kultura entre labarik no foinsa’e timoroan sira, no projetu reabilitasaun ne’e asina iha fulan Janeiru 2024 no remata ho susesu iha fulan Fevreiru 2025.
“Permite ha'u hato’o parabéns ba Sala Leitura Xanana Gusmão, ne’ebé implementa projetu ne’e ho efektivu. Apoiu ne’e forma parte husi esforsu governu Japaun atu sustenta organizasaun naun lukrutivu sira iha nasaun dezenvolvimentu nian, hodi loke dalan ba amizade no kooperasaun ne’ebé naruk entre Timor-Leste no Japaun, iha domíniu kultura no edukasaun.” hateten Embaixadór Kimura.
Iha fatin hanesan, Sua Exelénsia Ministra Edukasaun, Dra. Dulce de Jesus Soares, hanesan mós membru konsellu Sala Leitura Xanana Gusmão, hateten, projetu ida-ne’e sei fó kontribuisaun signifikante ba kontinuidade Sala Leitura Xanana Gusmão, nu’udar sentru koñesimentu, kultura no identidade nasionál. Projetu reabilitasaun ne’e la’ós de’it halo renovasaun fízika, maibé mós fornesimentu materiál foun ba biblioteka no muzeu, atu sustenta edukasaun no valorizasaun kultura,” dehan Ministra.
“Ami hato'o ami-nia agradesimentu kle'an ba governu no povu Japaun ba sira-nia amizade no komitmentu kontinua ba dezenvolvimentu timor-leste. Projetu Reabilitasaun Sala Leitura Xanana Gusmão, ne'ebé hahú rehablita iha fulan-fevereiru tinan 2024 no remata ona iha fulan-fevereiru tinan 2025, reprezenta realizasaun signifikante ida-ne'ebé bele realiza liu husi apoiu ne'ebé iha valór husi Embaixada Japaun iha Timor-Leste”, dehan S.E. Ministra Edukasuan.
Governante ne’e hatutan, rehabilitasaun ne'e inklui área krítiku sira iha instalasaun ne'e, inklui mós muzeu, uma mahon, pavamentu, biblioteka, no sentru perimeter. importante liu projetu ida-ne'e mós haluan ba fornesimentu materiál aprendizajen foun sira ba biblioteka no hasa'e materiál espozisaun sira ba muzeu, hodi asegura katak Sala Leitura kontinua sai hanesan sentru koñesimentu, kultura no identidade nasionál ne'ebé vibrante.
#MédiaME
