Aileu – Loron, Tersa-Feira, 14 Janeiru 2025
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho profesór sira hotu husi Ensinu Pré-Eskolár to’o iha Ensinu Sekundáriu Jerál no Ensinu Sekundáriu Tékniku Vokasionál iha Munisípiu Aileu nian, hodi fahe rezultadu ne’ebé alkansa ona no dezafiu sira ne’ebé infrenta durante tinan 2024, no divulga planu asaun anuál no orsamentu Ministériu Edukasaun ba tinan 2025, iha salaun Rai Klaran Munisípiu Aileu.
Iha dikursu, Sua Exelénsia Ministra Edukasaun Dra. Dulce de Jesus Soares hateten, komunidade edukativu ne’ebé importante liu mak iha nível eskola. Eskola sira mak parte importante liu-husi sektór edukasaun. Eskola bele hetan orientasaun, apóiu, no formadu hosi polítika no programa sira iha nível nasionál no munisipál, maibé tuir loloos eskola ida-idak mak halo desizaun atu uza polítika no programa sira-ne’e, atu kria ambiente aprendizajen ida-ne’ebé di’ak liu no efetivu liu ba ninia manorin no estudante sira.
“Se mak importante liu iha Ministériu Edukasaun mak profesór sira, tanba profesór sira mak hela loron ba loron, tinan ba tinan hodi eduka estudante sira, hatene estudante sira-nia problema no eskola sira, la’os Governu ka Diretór iha nível nasionál, tanba ne’e ita boot sira mak ema importante atu garante katak susesu Ministériu Edukasaun nian, iha ita-boot sira-nia liman”, tenik Ministra Edukasaun.
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, husu ba profesór sira atu labele prátika polítika iha eskola sira, tanba tempu agora atu halo servisu, la’os ko’alia polítika, no husu mós parte PNTL atu kontrola mós estudante sira atu labele lori arte marsiais no arte rituais tama ba eskola hodi kria instabilidade iha eskola.
“Diretór eskola no profesór sira, ba tinan foun ida ne’e haluha tiha pasadu sira no lori hanesan referénsia ba ita-boot sira hodi hala’o servisu ho di’ak liután liuhusi programa Ministériu Edukasaun nian, hodi lori edukasaun ida ne’ebé kualidade ba timoroan hotu, dehan S.E. SEESG no ESTV.
#MédiaME
#jornalistaclarinopacheco
