Ainaro, Tersa-feira, 17/09/2024
Ministériu Edukasaun liuhusi Xefe Gabinete Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Napoleão de Aráujo Santos Lima hamutuk ho Sekretáriu Estadu Formasaun Profesionál no Empregu (SEFOPE) Interino Sr. Mateus W. do Santos Tallo halo abertura feira kona-ba karreira no edukasaun iha Salaun Parokia Munisípiu Ainaro tersa-feira ne’e.
Iha Intervensaun reprezenta Sekretáriu Estadu ESJ-ESTV Sr. Napoleão de Aráujo Santos Lima hateten, Edukasaun mak dalan ida ne'ebé unik liu ba alin estudante sira.
Liu hosi Edukasaun mak bele transforma pensamentu ema ida nian sai sistematika no kritiku, nomos bele ilustra karakteristika ida ho etika no iha responsabilidade.
Tanba ne'e hakarak husu ba alin estudante sira atu aproveita feira kareira no edukasaun ne'ebé halao hosi SEFOPE ne'e ho didiak. Feira kareira no edukasaun ida nee sei fasilita divulga informasaun sira liga ho oportunidade empregu produtivu, formasaun profesional, edukasaun no atividades seluk konaba mundu servisu nian. Husi divulgasaun hirak ne'e bele ajuda Alin estudante finalista 12⁰ ano Ensinu Sekundáriu, karik iha futuru termina kursu ida ne'e bele iha ona desijaun hodi eskolla karik iha posibilidade kuntinua estudu no involve a'an iha mundu servisu nian.
"Hakarak haktuir mos liafuan hosi prezidente Autoridade Munisípiu Ainaro nian hateten ba Estudante sira hosi ESG no ESTV katak Eskola mak diak liu. Lalika hanoin atu forma familia uluk, preukupa uluk mak edukasaun imi nian. tanba ne'e, hakarak enkoraja imi hotu atu hakas a'an estuda, ho edukasaun deit mak sei fo koris ida furak no felisidade moris nian iha futuru.", Tenik Xefe Gabinete Sekretáriu Estadu ESG-ESTV.
Iha fatin hanesan Sua Exelénsia Sekretáriu Estadu Formasaun Profesionál no Empregu (SEFOPE) Interino, Sr. Mateus W. do Santos Tallo iha nia intervista hateten katak, bazeia ba polítika programa nonu governu ninian oinsá atu implementa programa no prosedimentu karreira ba estudante finalista liuliu ba desimu terseiru iha teritoriu timor laran tomak.
"Objetivu husi feira ne'e, oinsá atu gia ita nia estudante finalista sira hodi sira bele hili sira nia dalan, karik sira remata ona sira nia estudu iha nivel ensinu sekundáriu”.
Munisípiu Ainaro hanesan Munisípiu ida ne’ebé mak espesifiku liu ba area hortikultura tamba ne’e hanesan Ainaro oan tenki aproveita potensia hirak ne'e ho didiak hodi dezenvolve. Ho potensia ne'ebé iha importante teb-tebes atu estudante finalista sira bele hare hetan ona, oinsa sira iha futuru bele prepara sira nia an liu-liu hodi hasoru nesesidade merkadu iha futuru.
Governante ne’e akresenta tan hanesan estudante finalista, sira ne’ebé remata ona iha nivel ensinu sekundáriu no sira ne'ebé mak iha ona kapasidade no vizaun ba oin, bainhira remata sira-nia estudu, sira hatene ona saida mak sira bele halo.
Hafoin remata tiha abertura Sua exelénsia, Sekretáriu Estadu SEFOPE Interino no Xefe Gabinete Sekretáriu ESJ-ESTV hamutuk ho konvidadu sira halo vizita no observa direta ba feira refere.
#jornalistamario
#MédiaME
