Díli – Loron, Tersa-Feira, 24 Setembru 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, hamutuk ho parseiru nasionál no internasionál sira partisipa iha forum Asaun Konjunta ba Edukasaun Timor-Leste (ACETL-sigla portugés), hodi fahe informasaun kona-ba progresu servisu ne’ebé Ministériu Edukasaun atinji ona hamutuk ho parseiru sira kona-ba servisu sira iha área edukasaun. Forum ne’e realiza iha City 8 Manleuana, Díli.
Iha enkontru, Sua Exelénsia Ministra Edukasaun Dra. Dulce de Jesus Soares, hateten, ACETL ida-ne'e mak oportunidade ba Ministériu atu fahe informasaun kona-ba atividade xave sira-ne'ebé implementa to'o agora, maibé ho ideia katak uza koñesimentu ida-ne'e atu ita hotu iha pájina ida de'ït, no asegura katak apoiu GPE sira hotu - dezde projetu BEST to'o projetu foun Compact ne'e, mak sei uza ho maneira efetivu liu, ne'ebé garante katak estudante sira-nia nesesidade mak prioridade úniku no aprendizajen aumenta ba beibeik.
“Mantein forsa maka'as pozitivu no aprosimasaun unifikadu mak kruxiál ba progresu ne'ebé ita hotu hakarak. Ha'u enkoraja partisipante sira hotu ohin loron atu fó sai ita-nia hanoin no ideia sira, tanba liuhosi serbisu hamutuk mak ita bele atinji ita-nia meta liuhosi uza abordajen, nasaun mak na'in no nasaun mak lidera”, dehan S.E. Ministra Edukasaun.
Governante ne’e hatutan, dala ida tan, obrigada barak ba ita-bo’ot sira hotu nia dedikasaun, apoiu no parseria. Hamutuk ita bele kria impaktu transformativu ba edukasaun no asegura aban bainrua ne'ebé di'ak liu ba ita-nia nasaun.
#MédiaME
