Dili, 5 Janeiru 2023 (SAPIENTIA)-Diresaun Servisu Edukasaun Munisípiu sira orienta ona kada Diretor Eskola atu divulga informasaun ho loloos ba inan ho aman estudante kona-ba sirkulár hosi Ministériu Edukasaun, Juventude no Desportu (MEJD), ne’ebe bandu ona atu labele suku farda foun iha tinan ne’e.
“Bazeia ba orientasaun ministériu, husu atu labele suku farda ba estudante tinan hanorin 2023, tamba ministériu iha ona planu atu prepara uniforme nasionál. Tanba ne’e estudante foun iha tinan ida-ne’e kontinua uza sira-nia farda hodi hein desizaun hosi ministériu,” dehan Diretor Servisu Edukasaun Munisípiu Manufahi, Vitorinu do Carmo, informa ba Agencia Tatoli, Via Telefonika foin lalais ne’e.
Nia dehan, ba estudante tuan sira bele kontinua uza nafatin sira-nia farda anteriór hodi hein modelu farda no kór foun ne’ebe sei prepara hosi MEJD, hafoin sei distribui ba kada eskola sira hodi entrega ba inan ho aman sira ida-idak hodi bele suku ba oan sira.
“ho nune’e ba tinan ida-ne’e estudante hotu iha territóriu nasionál, sei úza ida-idak ninia farda hodi hein to’o sirkular foun hosi ministériu nian tuun. Portantu, prosesu ensinu aprendizájen ba tinan letivu 2023, tuir kalindáriu ministériu sei hahú iha loron 9 Janeiru 2023 ba territóriu nasionál,” nia akresenta.
Nune’e mós Diretor Edukasaun Munisípiu Covalima, Ruia Amaral Suri Seran, hateten, eskola sira tenke informa ba inan ho aman hodi kumpri sirkulár hosi ministériu, tanba ne’e tenke hein bainhira desizaun tuun, maka eskola ho inan aman sira foin bele halo preparasaun suku farda ba estudante sira.
Enkuantu, kona-ba preparasaun prosesu ensinu aprendizájem, hosi parte servisu Edukasaun Munisipál, seidauk hetan dadus detallu kona-ba númeru estudante rejistu iha Covalima, iha tinan ne’e.
“maibe fiar katak, eskola hotu sei kumpri desizaun sira no sei hahú sira nia prosesu ensinu aprendizájem tuir kalindáriu ne’ebe termina ona,” nia tenik.
Media Sapientia. Bosco
