Dili, 3 Janeiru 2023 (SAPIENTIA)-Ministériu Edukasaun Jiuventude no Desportu (MEJD) prevee ona orsamentu millaun $11,3 atu hodi harii tan eskola foun 117 no edukasaun pré-eskolár rua iha fronteíra parte Badut-Mean no COVA, Munisípiu Bobonaru, Postu Administrativu Balibo
“ita sei kontinua tan projeitu rua sira iha fulan Fevereíru tinan ne’e tanba antes tinan 2022 remata, ami submete ona Bill of Quantity (BoQ) ba projeitu foun sira ba hotu ona obra. Semana rua tan sira bele devolve atu ami bele submete ba Ajénsia Dezenvolvimentu Nasional (ADN) nune’e Ministériu Edukasaun Juventude no Desportu bele kontinua halo kontratu ho grupo komunitária sira,” Diretor Nasional Dezenvolvimentu Parke Eskolár (DNDPE), Agostinho Soares, informa ba Sapientia, iha nia knaar fatin MEJD Vila Verde Dili.
Ministru Edukasaun Juventude no Desportu, Armindo Maia halo ona observasaun iha área fronteira hodi haree kondisaun labarik sira inklui fatin.
“Populasaun sira iha fronteira durante ne’e lori sira-nia oan ba eskola iha área Indonesia tanba iha fronteíra parte ita-nia laiha eskola edukasaun pré-eskolár ne’ebe besik ho sira nia hela fatin kompara lori sira-nia oan bá eskola iha Atabae. Tamba ne’e, ita-nia Ministru Edukasaun Juventude no Desportu deside tau orsamentu hodi harii eskola edukasaun pré-eskolár ida iha Badut-mean no Cova atu nune’e labarik sira bele hetan edukasaun adekuadu,” nia akresenta.
Enkuantu, iha fronteíra Cova, materiál ba labarik sira atu halimar iha edukasaun pré-eskolár iha ona maibé problema ida maka laiha fatin atu rai sasan.
“Entaun Ministériu iha hanoin halo kompleta, nune’e presija tau edifísiu edukasaun pré-eskolár ida iha Cova hodi bele asegura sasan sira no labarik sira iha Cova bele asesu edukasaun iha nível rua,” nia tenik.
Eskola 117 ne’ebe sei harii iha tinan 2023, kompostu hosi eskola edukasaun pré-eskolár 77 no eskola ensinu báziku no sekundáriu iha 40.
“VIII Governu Konstitusional hakarak harii tan eskola foun iha territóriu nasional maibé prioridade liu ba edukasaun pré-eskolár. Orientasaun hosi Dirasaun Nasional Dezenvolvimentu Parke Eskolár ne’ebe simu hosi Ministru Edukasaun, Juventude no Desportu, katak sei foku liu ba dezenvolvimentu edukasaun pré-eskolár, bazeia ba orientasaun Primeiru Ministru, Taur Matan Ruak, ne’ebe hakarak númeru boot liu ba pré-eskolár,” nia salienta. Media Sapientia MEJD
