Díli – Loron Kinta-feira, 21 Novembru 2024
Sua Exelénsia Ministra Edukasaun Dra. Dulce de Jesus Soares partisipa iha serimónia graduasaun periodu VII tinan akadémiku 2024 Pré-Eskolár Pe. Arturo, Kamale-Hohoru Liquiça, ho totál estudante hamutuk na’in 69.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, obrigadu no agradese ba Madre sira nia laran luak ho domin no responsabilidade hodi loke eskola Pré-Eskolár ida ne’e hodi fó oportunidade ba oan no beioan sira hodi bele aprende.
“Ohin ita hamutuk iha ne’e hamutuk ho inan aman sira atu festeza hamutuk ita-nian oan sira nia faze primeiru iha sira-nia moris, tanba ne’e ba inan-aman, avó, tiu no tia sira hotu katak pré-eskolár ne’e la’os fasil, tanba presiza tebes ita-nia ajuda atu sira bele ba eskola ho di’ak, maibé ho ita-bo’o sira nia esforsu ohin sira konsege kompleta ho di’ak”, dehan S.E. Ministra Edukasaun.
Dezenvolvimentu Pré-Eskolár ne’e sai baze, kuandu labarik ida mak iha baze di’ak, nia literasia, numerasia no aprende kona-ba disiplina étika morál no bainhira passa ba ensinu báziku no kontinua ba oin mak nia dezenvolvimentu sei forte tebes, tanba mai ona husi baze ne’ebé mak forte.
#MédiaME
