SEKRETÁRIU ESTADU ESJESTV PARTISIPA IHA SERIMÓNIA LANSAMENTU SALA KUIDADU SAÚDE HO EMFERMEIRU ESKOLÁR.
Dili, 21/02/2024- Exelénsia Sekretàriu Estadu Ensinu Sekundàriu Jerál no Ensinu Sekundáriu Tékniku Vokasionál Sr. Domingos Lopes Lemos partisipa iha serimónia lansamentu sala kuidadu saúde ho Enfermariu Eskolár, iha eskola 10 de Dezembru Comoro.
Iha Intervensaun Exelénsia Ensinu Sekretàriu Estadu ESJESTV Sr. Domingos Lopes Lemos hateten, enfermaria atu kuida saude eskolár reprezenta pasu importante, atu garante moris di'ak no dezenvolvimentu integral ba labarik sira iha idade eskolár.
"Saude no Edukasaun ho kualidade nian mak área prioridade husi IX Governu Konstitusional, ba dezenvolvimentu sosiedade sustentavel no mak ita-nia devér hanesan dirijente sira atu garante katak labarik sira iha asesu ba sira hotu", dehan Exelénsia ne'e.
Governante ne'e reafirma, Inisiativa ida-ne'e, ne'ebé dezenvolve hamutuk ho Ministeriu Edukasaun no Ministeriu Saude, nia objetivu mak atu fó fatin ne'ebé konfortável no seguru ba estudante sira, ne'ebé bele simu kuidadu saude primaria, monitorizasaun nutrisaun, no mós edukasaun ba saude. Prezensa husi enfermeiro iha eskola sei kontribui ba deteksaun sedu husi problema saude nian.
Fatin hanesan reprezentante Organizasaun Mundiál Saude iha TimorLeste( OMS ) Dr. Arvind Mathur hateten, orgullu OMS entrega sala saúde ne'ebé totalmente ekipada, ne'ebé hanaran ona "Sala de Bem-Estar (Sala Saudavel)", ne'ebé ekipada ho sasan esensial, ekipamentu médiku no konsumível sira.
"Ha'u hakarak extende ha'u nia gratidaun ba Ministériu Saúde ba sira nia fornesimentu aimoruk esensial sira, ne'ebé fornese liu husi Sentru Saúde Komunitária Comoro".
Reprezentante WHo ne'e deklara, Daudauk ne'e inisiativa ne'e komesa ho eskola ida de'it, tuir planu projetu nian sei iha tan expansaun pilotu ne'e ba eskola hamutuk 12 iha Munisipiu Dili, Bobonaro, Manufahi, no Baucau. OMS kontinua ho kompromisiu atu apoiu Ministériu sira iha extensaun atividade ne'e iha eskola 11 seluk.
Programa ne'e hetan suporta orsamentu husi KOICA, hamutuk $ 3.6 Milloens ba projetu tomak, servisu hamutuk ho WHO, Ministériu Saúde, Ministériu Edukasaun no sentru saúde Comoro nian hodi harii programa projetu ne'e.
