ME SEI INTEGRA DOKUMENTU KONA-BA FRATERNIDADE UMANA IHA KURÍKULU NASIONÁL

Díli, 23/02/2023 Ministériu Edukasaun liuhusi Xefe Gabinete Sra. Paula Flamínia da Silva Corte Real Araujo hamutuk ho Asesór ME ba Kurikulu Sr. Pedro Ribeiro Gonçalves, Asesora Ângela Corvêlo Sarmento no Asesora Jacinta Hanjam Corbafo, hamutuk ho Diretores Nasionais relevantes hala'o enkontru ho Asesór Prezidente Repúblika Sr. Nuno Horta hodi deskute kona-ba planu implementasaun ba Dokumentu Kona-ba Fraternidade Umana neebé hetan ona rezolusaun husi Parlamentu Nasionál, iha Salaun VIP Ministériu Edukasaun Vila-Verde.

Hafoin remata enkontru Asesór ba Kurikulu Ministériu Edukasaun nian Sr. Pedro Ribeiro Gonçalves hateten, enkontru ho Asesór Presidente Repúblika nian atu fó kontinuasaun de'it ba aprezentasaun ne'ebé antes ne'e asesór Sr. Pedro Ribeiro Gonçalves aprezenta ona ba Sua Exelénsia Presidente Repúblika kona-ba planu implementasaun husi Ministériu Edukasaun ba dokumentu ne'e rasik. Dokumentu kona-ba Fraternidade Umana hanesan dokumentu ne'ebé assina husi Papa Francisco ho Grande Imame Al Azzar, Ahmad Al-Tayyeb iha Abu Dhabi, no Timor-Leste sai hanesan primeiru país ne'ebé adota dokumentu ne'e liuhusi aprovasaun iha unanimidade ba rezolusaun Parlamentu Nasionál n° 11/2022, 13 de maiu nian.

Ministériu Edukasaun simu orientasaun husi Sua Exelénsia Presidente Repúblika no sei asume responsabilidade tomak atu garante katak Dokumentu Fraternidade Umana ne'e bele hatama iha kuríkulu Ministériu Edukasaun nian nomós integra materia Fraternidade Umana iha Formasaun ba Profesór sira, dehan Asesór Pedro.

Asesór ne'e esplika, alende integra iha kuríkulu no formasaun ba professores, iha mós atividade disseminasaun ba dokumentu ne'e ba komunidade edukativa inklui atividades seluk liuhusi meius oioin no servisu hamutuk ho Gabinete Prezidente Repúblika atu garante dokumentu ofisiál ne'e bele implementadu ho di'ak iha komunidade edukativa no públiku enjerál.