Dili - Tersa-Feira, 30/04/2024
Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos halo abertura ba kursu Formasaun profesór sira iha Ensinu Sekundáriu Jerál iha Ámbitu modalidade Blended Learning liu Zoom Meeting iha Auditóriu INFORDEPE Tersa-feira ne'e.
Hafoin abertura Prezidente Institutu Nasionál Formasaun Dosente Profesionál Edukasaun (INFORDEPE) Sr. Domingos Martins deklara, liu husi informasaun ida ne'e mak INFORDEPE primeira vez hala'o desde eziste husi 2022 to'o agora seidauk iha informasaun online.
"Ohin ita hahú formasaun liu husi zoom online no hanesan projeitu pilotu ne'ebé mak INFORDEPE halo ohin loron iha Munisípiu Manufahi, Suai, Bobonaru, Baucau no Dili, liu husi dijilitasaun ne'e hodi hatoman sira atu utiliza plataforma média online ne'e ho di'ak", katak Prezidente INFORDEPE ne'e.
Fatin hanesan Exelénsia Sekretáriu Estadu ESJESTV Sr.Domingos Lopes Lemos hatutan, Aprendizajen ibrida ka "Blended learning" mak sai hanesan estratéjia aprendizajen ida neʼebé iha konbinasaun entre aula presensial no aula online, no sai hanesan modelu aprendizajen ida ne'ebé efetivu, kolaborativu, no inovativu. Maibé, atu susesu iha implementasaun estratéjia "blended learning" presiza tebes atu konprende ho loloos kona-ba konseitu blended learning no feramentu ka aplikativu edukasionál sira ne'ebé uza.
"Tan ne'e ha'u kontente atu hasoru malu ho ita-boot sira atu halo abertura ba formasaun ida-ne'e kona-ba blended learning, tanba maski iha posibilidade katak buat barak bele sai problema, no maski ida-ne'e foun, ita-boot sira halo RISKU, no koko atu halo buat oin- seluk duké baibain, tan ne'e, ha'u sente katak molok formasaun ida-ne'e hahú, nia sai susesu ona", katak Governante ne'e.
Governante ne'e haktuir tan katak, Teknolójia la substitui manorin no abilidade atu hala'o pedagójia di'ak. Loos-duni, lalika uza teknolójia se seidauk hatene hanorin ho efetivu, no teknolojia mós lori ninia problema rasik, hanesan notisia falsu, cyber-bullying, abilidade sosial menus, no falta konsentrasaun, nune'e tenke uza ho kuidadu. Maibé uza teknolójia atu haboot-hadi'ak ita- nia prosesu ensinu-aprendizajen mak maneira ida atu halo matéria sai interesante, promove inkluzaun ba estudante ho abilidade oioin, no mós ajuda profesór atu uza rezultadu iha maneira sistemátiku hodi halo avaliasaun no buka maneira atu hanorin ho di'akliu.
"Ha'u komprende katak ba ema balu neʼebé atu tuir kursu ida-ne'e matéria sei difisil uitoan, tanba seidauk toman. Maibé ha'u enkoraja ita-boot sira atu haka'as an hodi koko no koko tan, lalika sente moe se la komprende lalais, maibé kontinua to'o komprende no bele uza ho ita-nia estudante sira, tanba hakarak ka lakohi, aprendizajen online sei ita-nia futuru, liuliu tanba ninia kustu-efetividade".
Enkuantu formasaun ne’e realiza husi Institutu Nasionál Formasaun Dosente Profesionál Edukasaun ( INFORDEPE), totál formandu ba Zoom Meeting ne'e hamutuk na'in 100, husi Munisípiu ida reprezentante ema na'in 25, formasaun ne'e foka liu ba Ensinu Sekundáriu Jerál sira iha teritóriu Timor laran tomak.
#jornalistarita
#MédiaME
