Díli – Loron, Kinta-Feira, 02 Maiu 2024
Sua Exelénsia Ministra Edukasaun Dra. Dulce de Jesus Soares partisipa iha workshop altu nivel hodi ko’alia kona-ba asuntu importante tolu, hanesan “International Classification of Diseases” (ICD), Inseguransa ai-han ka mal nutrisaun no kapasitasaun foinsa’e atu bele prepara timoroan sira hodi lori nasaun ne’e bá oin. Workshop realiza iha Sala Auditorium Kay Rala Xanana Gusmão, Ministériu Finansas.
Iha entrevista Vise-Primeiru Ministru, Ministru Koordenadór Asuntu Sosiais no Ministru Dezenvolvimentu Rural no Habitasaun Komunitária, Eng. Mariano ASSANAMI Sabino hateten, problema ne’ebé mak nasaun hasoru mak mal nutrisaun no mós kona-ba problema joven sira ne’ebé mak presiza prepara, tanba futuru iha sira nia liman.
“Isu tolu (3) ne’ebé ita hatene katak ne’e komplikadu, tanba ne’e mak vizaun Prezidente Repúblika nian atu hamosu task force ida ne’ebé hamutuk ho ministériu sira ka inter ministeriál no mós iha ajénsia sira no embaixadór/a sira hodi foku servisu iha buat tolu (3), ida mak ICD liuliu ita prepara bebé sira hodi la’o di’ak nafatin bá oin, inseguransa ai-han no ikus mak joven ne’ebé ita tenke prepara, kapasita atu lori nasaun ne’e bá oin” dehan VPM-MCAS-MDRHC.
Governante ne’e hatutan, ohin halo workshop boot ida atu formaliza no realiza atu oinsá mak bele dudu grupu tolu (3) ne’e bá oin ho servisu di’ak liu no implementasaun ne’e kada liña ministeriál, tanba ko’alia kona-ba bebé, labarik oinsá sira bele envolve iha eskola, ko’alia mós kona-ba saúde no mós agrikultura atu bele dudu labarik no foinsa’e sira ba futuru Timor-Leste nian.
#jornalistapauladelgado
#MédiaME
