SEKRETÁRIU ESTADU ESJESTV ASINA AKORDU BA TRANSFERÉNSIA EDIFÍSIU EBC BOGORO BA ESKOLA SEKUNDÁRIA JERÁL PARALELO BOGORO.
Dili, 25/01/2024- Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho Prezidente Autoridade Munisípiu Liquiça asina akordu transferénsia edifísiu Ensinu Báziku Central Bogoro, ba Eskola Sekundáriu Jerál No 1 Paralelo Bogoro.
Iha entrevista Prezidente Autoridade Munisípiu Liquiça Sr. Paulino Ribeiro hateten, Hanesan Prezidente Autoridade Munisípiu Liquiça apoiu kualkuer desizaun husi governu sentrál, eskola Sekundária Jerál Liquiça no klase Paralelo Bogoro apoiu 100% laiha rezerva.
"Hanesan presidente Autoridade Munísipiu husu ba inan aman, Autoridade lokál sira tau matan ba iha eskola Bogoro ne'e, tanba eskola ne’e tanba iha komunidade", katak nia.
Autoridade Munisípiu ne'e dehan, Apela ba lideransa komunitária atu tau matan ba eskola iha Liquiça, nune'e funsionamentu aprendizajen la'o di'ak, servisu hamutuk nafatin ho Governu sentrál atu nune'e funsionamentu tuir orariu ne'ebé mak iha.
Fatin hanesan iha Exelénsia Sekretáriu Estadu ESJESTV Domingos Lopes Lemos reafirma, eskola entrega malu fatin de'it eskola Sekundária Jerál ba fali iha ensinu báziku, Tanba ne'e mak inan ama sira lider komunitária sira hotu mai iha ne'e halo konkordansia hodi troka fatin ne'e.
"troka edifísiu ba malu ne'e, parte profesór no inan aman sira mak desidi, ami la foti desizaun", katak governante ne'e.
Hafoin atividade ne'e remata exelénsia entrega komputador tolu (3) ba Eskola Sekundáriu Klase Paralelo hafoin ho ekipa vizita kedas ba eskola Ensinu Sekundáriu Klase Paralelo Bazartete no Eskola Téknika Vokasionál Agrikula Leorema akompania husi Diretór Edukasaun Munisipiu, Diretór Nasionál Ensinu Tekniku Vokasionál, Diretór Infrastrutura, Diretór Jéral Ensinu, Diretór Ensinu Sekundáriu Jerál, Gabinete Avaliasaun Kuríkulum.
