ME HALO ABERTURA BA KONKURSU BOLSA KANDIDATU BA MANORIN 2024
Venilale, 29/01/2024 – Ministra Edukasaun Dra. Dulce de Jesus Soares halo abertura ba konkursu bolsa kandidatu atu sai manorin iha tinan 2024 hafoin remata tiha lansamentu ba programa ALMA, iha Munisípiu Baucau, Postu Administrativu Venilale, Suku Bercoli.
Iha diskursu Ministériu Edukasaun Dra. Dulce de Jesus Soares hateten, Ministériu Edukasaun hahú ohin dader loke aplikasaun online ba ema se de’it mak hakarak atu sai manorin iha Ministériu Edukasaun
“Bainhira aplika ona sei hetan númeru verifikasaun no tau hamutuk ho dokumentu hanesan fotokopia Kartaun Eleitoral, Billete Identidade, foto 3x4 tahan ida no diploma legalizadu ho mínimu baixarelatu hafoin lori ba fatin atendementu iha kada munisípiu”, dehan Ministra Edukasaun.
Governante ne’e hatutan, ba dala-uluk hafoin ukun-an Ministériu Edukasaun halo rekrutamentu ba profesór no profesora sira hamutuk na’in 2400 atu bele hasa’e liután kualidade ensinu iha eskola sira.
Iha fatin hanesan Prezidente Autoridade Munisípiu Baucau Sra. Veneranda E. M. Lemos Martins hateten, rekrutamentu bolsa kandidatu ba manorin liuhusi aplikasaun online ne’ebé halo ba da-uluk hatudu momós nu’udar inovasaun ida.
“Parabens Sra. Ministra ne’ebé lidera Ministériu Edukasaun iha governu konstitusionál da-9 nomós ba parseiru sira hotu ne’ebé kontribui ba prosesu programa sira ne’e, hanesan Prezidente Autoridade Munisípiu Baucau, ha’u hakarak ita mantein servisu ho kolaborasaun di’ak sira mak la’o ona durante ne’e”, dehan PAM Baucau.
