ME HATAN BA PREOKUPASAUN PÚBLIKU KONA-BA SIRKULÁR NO.369/XII/DGEE/2023
Díli, 24/01/2023 – Ministériu Edukasaun liuhusi Diresaun Jerál Ensinu Pré-Eskolár, Ensinu Báziku no Ensinu Rekorente hamutuk ho Diresaun Jerál Ensinu Sekundáriu hatan ba preokupasaun públiku liuhusi komunikadu imprensa ligadu ho sirkulár nú.369/XII/DGEE/2023, 12 dezembru ba EPE, EB no Sekundáriu. Komunikadu imprensa ne’e realiza iha sala konferénsia Ministériu Edukasaun, Vila-Verde.
Iha komunikadu imprensa ne’e, Diretór Jerál Edukasaun no Ensinu Deolindo da Cruz hateten, sirkulár refere la ko’alia ka fó orientasaun ba eskola públika sira atu hapara profesór no profesora parsiál sira ne’ebé durante ne’e selu husi inan-aman (Assciação dos Pais).
“Kontribuisaun ne’ebé durante ne’e la’o hela entre eskola públiku sira no inan-aman bazeia ba akordu mútua bele kontinua nafatin tuir Dekretu-Lei nú.32/2023, Art. 87 no Dekretu-Lei nú.33/2023, Art. 93, 31 de maiu, tanba ne’e kontribuisaun ne’ebé mak balun inspetór eskola sira rekolla ona provizoriamente sei entrega fila-fali ba eskola idak-idak hodi asegura desidi liuhusi reuniaun entre eskola no inan-aman hodi hetan akordu mútua” dehan DG.
DG hatutuan, ba estudante 7º no 10º anu, eskola labele husu kontribuisaun bainhira seidauk iha konkordánsia mútua entre inan-aman, eskola nomós prezensa inspetór no inspetora eskolár sira.
Enkuantu, sirkulár no.369/XII/DGEE/2023, 12 dezembru nia objetivu mak Ministériu Edukasaun hakarak hatun oriéntasaun ba eskola públiku sira husi nível hotu-hotu iha teritóriu Timor laran tomak hodi labele halo kobransa ilegál durante tempu matríkula nia laran hodi garante sidadaun hotu-hotu nia direitu no oportunidade ba asesu edukasaun tuir KRDTL, Art.59:1 no 2.
