Covalima - Segunda-feira, 17/06/2024
Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho Prezidente INFORDEPE Sr. Domingos Martins akompaña husi Diretór Nasionál Ensinu Sekundáriu Jerál Sr. Benjamin da Cruz halo abertura ba kursu formasaun aprimoramentu Língua Portuguesa ba Profesór/a sira husi Eskola Sekundária Tékniku Vokasionál iha Munisípiu Covalima Segunda-feira ne’e iha eskola Sekundária Tékniku Vokasionál Akar-laran.
Iha abertura Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hateten, formasaun intensiva ida-ne'ebé kontinua husi INFORDEPE, ne'e dedikadu hodi hadi'ak lian Portuguesa ba profesór sira husi ESTV Suai, iha loron lima tuirmai, iha oras 40 nia laran.
“Husi kursu ida-ne’e formandu sira atu hakle'an liután área Portuguesa nian, instrumentu ida-ne'ebé forte tebes loke horizonte foun sira iha ita-nia karreira hanorin nian. Kobre módulu ida-idak husi kursu ne'e nu'udar importante hodi haburas susesu profisionál”, informa Exelénsia ne’e.
Governante ne’e esplika katak, esperiénsia no dedikasaun mak baze ba programa ne'e. Durante loron lima ne'e, lian sei sai hanesan modelu ne'ebé sei ajuda atu forma futuru edukasaun iha eskola Téknika Vokasionál iha komunidade Suai, dedikasaun liuhusi língua ho edukasaun no prezente boot liu ne'ebé sira bele oferese ba formasaun ida-ne’e
“Kursu ne'e la'ós de'it forma simples, no selebra koñesimentu no hakarak atu aumenta koñesimentu. Ha'u enkoraja imi atu aproveita dalan ne'e iha momentu hotu. Mai ita ko'alia, husu, no liuliu fó inspirasaun ba malu. Hamutuk, ita sei hametin kualidade hanorin iha lian Portuguesa no, iha fatin hanesan, haforsa edukasaun ba ita-nia estudante sira-nia entuziazmu, hodi dezenvolve lian iha semana ida hodi transforma aprendizajen. Boa sorte ba hotu-hotu”, informa governante ne'e.
Fatin hanesan Prezidente INFORDEPE Sr. Domingos Martins fó sai tan katak, formandu hotu-hotu tenke aproveita didi’ak tempu ne’ebé nia knaar sai nu'udar formandu no tuir kursu ne’ebé ema barak sei joven de’it, husu aproveita didi’ak husi formador sira.
Enkuantu formasaun ne’e realiza husi INFORDEPE kooperasaun ho Instituto Camões, Profesor/a ESTV Munisípiu Covalima ne’ebé tuir formasaun língua portuguesa ne’e hamutuk na’in-31, kompostu husi Eskola Sekundária Téknika Vokasionál Claret, Zumalai, Cristal, Akar-Laran.
#MédiaME
