Díli, Tersa-Feira 18 Juñu 2024
Sua Exelénsia Ministra Edukasaun Dra. Dulce de Jesus Soares partisipa iha konferénsia kona-ba Diversifikasaun Ekonómika ba Dezenvolvimentu Sustentavél ho objetivu atu tau esforsu hamutuk hodi implementa estratéjia, nune’e atinje alvu dezenvolvimentu liuliu ba kreximentu ekonómiku iha rai laran. Konferénsia ne’e realiza Iha Salaun Nobre MNEC.
Iha diskursu, Sua Exelénsia Prezidente Repúblika Dr. José Ramos-Horta hateten, Palestra Prezidensiál Série da-III nu'udar parte ida husi Prezidente nia kompromisu atu promove diálogu no kolaborasaun kona-ba kestaun xave sira ne'ebé afeta dezenvolvimentu Timor-Leste nian. Rezultadu husi diskusaun ne'e sei informa rekomendasaun polítika no kolaborasaun sira iha futuru ho objetivu atu promove kreximentu ekonómiku sustentável no diversifikasaun iha nasaun ne'e.
"Série palestra ida-ne'e hanesan plataforma importante ida atu diskute dezafiu ekonómiku no oportunidade sira ne'ebé ita-nia nasaun hasoru. Liuhusi halibur ofisiál governu sira, Korpu Diplomátiku, parseiru dezenvolvimentu sira, ONG, akadémiku, no lider emprezariál sira, ita bele kolabora hamutuk hodi harii ekonomia ida-ne'ebé reziliente no diversifikadu liu ba ita-nia nasaun," afirma S.E. Prezidente Repúblika Dr. José Ramos-Horta.
Iha fatin hanesan, Sua Exelénsia Governadór Banku Sentrál Sr. Helder Lopes esplika, konferénsia ida-ne’e importante tebes, tanba Banku Sentrál iha oportunidade hoti partilla informasaun ne’e atu entidade relevante sira, liuliu governu no parseiru dezenvolvimentu sira atu bele iha koñesimentu kona-ba situasaun atuál no oinsá mak bele servisu hamutuk hodi rezolve ekonomia iha rai-laran.
#JornalistaLuis
#MédiaME
