SEKRETÁRIU ESTADU ENSINU SEKUNDÁRIU JERÁL NO ENSINU TÉKNIKU VOKASIONÁL ENSERAMENTU ATIVIDADE FEIRA IHA UNIVERSIDADE DILI.

Dili 05-09-2023, Sekretáriu Estadu Ensinu Sekundáriu Jéral no Ensinu Tékniku Vokasionál Sr. Domingos Lopes Lemos halo enseramentu ba atividade feira ho tema Siénsia no abilidade iha eskola Universidade Dili (UNDIL), Maskarinhas.

Iha diskursu eselénsia Sekretáriu Estadu ESGETV Domingos Lopes Lemos hateten, dekada ikus ne'e siénsia no teknolojia apresenta inovasaun hanesan teze sentrál hodi promove desenvolvimentu Nasionál, atividades hanesan ne'e presiza realiza atu bele kapasita nafatin estudantes sira husi ensinu sekundariu hodi promove nafatin abilidade sira ne'ebé mak estudante sira iha.

"Siénsia no teknolójia iha relasaun ne'ebé komplexa maibé atu atinje patamares teknolójia, ita presisa atu kumpriende mós prosesu ba inovasaun no konstrusaun ba kompetetividade nasaun ida nian, maibé depende mós ba fenomenu multi-fatoriais hanesan, finansiamentu, kondisões makro ekonómiku no desenvolvimentu sientífiku no teknolójia", deklara eselénsia ne'e.

Governante ne'e esplika tan, Siénsia no teknolójia haree mós katak kresimentu rekursus bo'ot presisa atu promove analise ida flexível kona ba plano asaun Timor-Leste ho visuan ida ne'ebé intergrativu ba siensias.

Feira ne'e Universidade Dili (UNDIL), Fakuldade Enjenaria, Departamentu Enginaria industria mak realiza, hahú iha loron 1 fulan Setembru tinan 2023, remata iha loron 5 fulan Setembru. Atividade ne'e hola parte mós husi estudante Ensinu Sekundáriu Tekniku Vokasionál sira. Hafoin ensera atividade feira ne'e Sekretáriu Estadu ESGETV akompaña husi Diretór Ensinu Sekundáriu Tékniku Vokasionál, Diretór Jéral Ensinu Sekundáriu hala'o vizita mós ba laboratoriu rentaria.