MINISTRA EDUKASAUN PARTISIPA IHA EVENTU KONA-BA LORON MUNDIÁL LITERASIA IHA EBF EDIRI
Liquiçá, 08/09/2023 – Ministra Edukasaun Dra.Dulce de Jesus Soares partisipa iha eventu loron mundiál Literasia liuhusi atividade sira hanesan lee, hakerek, rona no ko'alia iha Eskola Ensinu Báziku Filiál (EBF), Postu Administrativu Maubara, Munisípiu Liquiçá, Sexta-feira ne'e.
Iha eventu ne'e Ministra Edukasaun Dra. Dulce de Jesus Soares hateten inan-aman sira ajuda fó hanoin ba oan sira hodi uza tempu uitoan atu lee hamutuk mak sai dalan ba hasa’e kualidade edukasaun iha Timor-Leste, tanba literasia mak baze ba aprendizajen.
"Atividade ne’e di'ak tebes, maibé importante liu mak atu fó hanoin ba profesór/a, inan-aman, joven feto no mane no ba ema hotu hodi lee hamutuk ho oan sira atu hatoman-an lee livru, revista, jornál no seluk tan", dehan Ministra.
Governante ne’e hatutan, labarik ida nia literasia ladi'ak iha 1⁰ anu ka lee lahatene sei sai problema no sei implika ba nia prosesu aprendizajen, tanba sei la aprende matemátika, siénsia inklui matéria sira seluk.
Enkuantu atividade ne’e realiza, tanba hetan apoiu tékniku no finanseiru husi Mary MacKillop Today (MMT) servisu hamutuk ho Ministériu Edukasaun (ME) liuhosi Edukasaun Munisípiu Liquiçá no hetan partisipasaun husi Presidente Casa Civil ho nia komitiva, Prezidente INFORDEPE ho nia komitiva, reprezentante Embaixadora Austrália iha Timor-Leste, Komandante PNTL Munisípiu Liquiça, inklui inan-aman sira.
