MINISTRA EDUKASAUN HALA’O ENKONTRU HO KOORDENADORA REZIDENTE UN NIAN IHA TIMOR-LESTE HODI KO’ALIA KONA-BA OPOIU NE’EBÉ DURANTE NE’E HALO BA MINISTÉRIU EDUKASAUN
Dili, 05/09/2023 – Ministra Edukasaun Dra. Dulce de Jesus Soares hala’o enkontru ho Koordenadora Rezidente Nasoens Unidas nian iha Timor-Leste hodi ko’alia kona-ba apoiu ne’ebé durante ne’e ba Ministériu Edukasaun liuhusi ajénsia UN nian hanesan UNICEF, WFP, UN-WOMEN, iha Salaun VIP Ministériu Edukasaun, Vila-Verde.
Iha enkontru ne’e Ministra Edukasaun Dra. Dulce de Jesus Soares hateten, UN nia apoiu mai iha Timor-Leste liu-liu iha Ministériu Edukasaun maka apoiu merenda eskolár no dezenvolve kuríkulu ba Pre-Eskolár no Ensinu Báziku sira.
“UN fó apoiu mai governu Timor-Leste iha área dezenvolvimentu barak mak hanesan dezenvolve kuríkulu, formasaun ba profesór/a sira nomós iha situasaun difisil hanesan iha covid sira apoiu barak ba eskola sira hanesan halo tanki bee no seluk tan nomós fó abilidade téknika balun ba Ministériu Edukasaun”, dehan Ministra.
Iha fatin hanesan Koordenadora Rezedente UN iha Timor-Leste Sra. Funmi Balogun hateten, ba vizita dahuluk ne’e atu fó parabens ba Ministra Edukasaun ne’ebé simu nomeasaun hanesan membru governu nomós ko’alia kona-ba oinsá mak UN bele kontinua fó apoiu ba governu liuhusi Ministériu Edukasaun.
“Ohin mai ko’alia ho Ministra Edukasaun kona-ba programa sira ne’ebé mak hala’o ona iha área edukasaun nian husi nível báziku to’o nível sekundáriu nomós fó ami nia komitmentu ba governu hodi kontinua apoiu ne’ebé ami fó”, dehan Koordenadora UN.
Koordenadora ne’e hatutan, iha enkontru ne'e, rona mós husi Ministra Edukasaun kona-ba programa governu da-9 nian nomós iha planu atu halo reuniaun iha fulan outubru tinan ne’e ho parseiru dezenvolvimentu sira tomak inklui Nasoens Unidas atu halo diskusaun kona-ba oinsá bele apoiu servisu no dezenvolve setór edukasun ba oin.
