SEKRETÁRIU ESTADU ENSINU SEKUNDÁRIU JERÁL NO ENSINU SEKUNDÁRIU TÉKNIKU VOKASIONAL VIZITA FATIN IMPRENSAUN PONTUS EZAME NASIONÁL TINAN 2023
Dili, 20 -09-2023- Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hala'o vizita ba iha sentru Imprensun hodi observa direita kona ba pontus ezame Nasionál tinan letivu 2023, iha Kolmera.
Iha vizita ne'e eselénsia Sekretáriu Estadu ESGESTV hateten, Prosesu imprime kuaze atu remata ona, imprime ne'e sei remata iha loron 12 fulan Outubru tinan 2023, hafoin halo distribuisaun.
"Governu rasik iha sentru imprensaun iha Comoro la halo imprime iha ne'eba tanba sitauasaun ida mak ita nia sentru imprensaun ne'e sei utiliza hela makina manuál, tanba ne'e bele estraga buat barak, ho razaun ida ne'e maka governu liu husi M.E loke tenderizasaun hodi Kompañia sira ba aplika ikus kompañia Silvia mak manán", dehan Sekretáriu Estadu ESGESTV Domingos Lopes Lemos.
Governante ne'e deklara, Materia balun remata ona, materia kona-ba Ensinu tékniku vokasionál nian mak dadaun ne'e sei iha prosesu imprime hela, prosesu imprime materia ne'e hahú iha loron 4 fulan Setembru tinan 2023 sei remata iha loron 12 fulan Outubru ne'e.
"Estudante ne'ebé mak sei tuir ezame nasionál tinan ano letivu 2023 ne'e hamutuk na'in 57 mil, kompostu husi estudante ensinu báziku to'o ensinu sekundáriu tékniku vokasionál.
Orsamentu ba imprime pontus ezame Nasionál tinan 2023 ne'e hamutuk $ 218 mil. Ezame nasional tinan 2023 ne'e sei realiza iha loron 16 fulan Outubru tinan 2023 iha nível teritóriu laran tomak.
