MINISTÉRIU EDUKASAUN IHA SORUMUTU HO PARSEIRU DEZENVOLVIMENTU PHD HODI ATUALIZA SERVISU SETÓR EDUKASUN NIAN

Díli, 21/09/2023 – Ministra Edukasaun hamutuk ho dirijente sira hala’o eskontru ho Parseiru Dezenvolvimentu Umanu (PHD) hodi atualiza servisu setór edukasaun nian ho programa "Apoiu Lideransa Liuhusi Mentória no Aprendizajen" (ALMA) ba manorin sira. Enkontru ne’e hala’o iha Salaun VIP Ministériu Edukasun, Vila-Verde.

Iha entrevista, Diretór Jerál Edukasaun no Ensinu, Deolindo da Cruz hateten, programa ne’e mai husi akordu ida hahú iha tinan 2016 no la’o durante tinan hitu (7) hodi kobre ona munisípiu hamutuk sanulu resin ida (11) no iha munisípiu tolu mak planu ba kontinua iha tinan oin maka hanesan Ainaru, Ermera no RAEOA.

“Tanba ne’e ohin mai atualiza progresu atividade ne’ebé sira halo ona no aprezenta mós planu ba munisípiu rua iha parte leste ne’ebé uluk iha faze terseiru sira seidauk kompleta. Tanba sira hakarak fila-fali ba munisípiu Viqueque no Baucau atu kompleta eskola ne’ebé mak falta pursentu 50”, dehan DJ.

DJ hatutan, iha enkontru ne’e S.E Ministra Edukasaun nia intervensaun katak reuniaun tuir mai ho kedas dadus no informasaun sira ne’ebé mai mós ho dezafiu, problema ne’ebé durante ne’e implementa programa atu bele buka solusaun, nune’e programa refere bele avansa ba oin ho di’ak liután.

Munisípiu Sanulu resin ida (11) ne'ebé implementa ona mak hanesan, Dili, Bobonaru, Covalima, Aileu, Liquiça, Manufahi, Manatutu, Baucau, Lautem no Viqueque. Maibé Baucau no Viqueque foin kobre pursentu 50.