MINISTRA EDUKASAUN PARTISIPA IHA MISA ANIVERSÁRIU COLÉGIO INFANTE DE SAGRES MALIANA BA DALA-75
Maliana, 07/10/2023 – Ministra Edukasaun Dra. Dulce de Jesus Soares hamutuk ho ekipa husi Ministériu Edukasaun partisipa iha misa aniversáriu Colégio Infante de Sagres Maliana ba dala-75 ezisténsia iha Timor-Leste, hahú husi tinan 1948 to’o ohin loron. Misa aniversáriu ne’e realiza iha resintu Colégio Infante de Sagres Maliana, Sábadu ne’e.
Iha selebrasaun misa ne’e Amu Bispo Dioseze Maliana Dom Norberto do Amaral hateten, ohin selebra Colégio Infante de Sagres Maliana nia tinan ba dala-75, tanba kolégiu ne’e produz ona matenek barak ne’ebé balun sai ona ministru, padre no Bispo hodi serví povu iha rai Timor-Lorosa’e.
“Colégio Infante de Sagres Maliana harii husi Monsenhor Dom Martinho da Costa Lopes hamutuk ho padre Manuel Luís ho minisionáriu sira seluk mak hala’o atividade ida ne’e hodi forma ema sai sidadaun ida di’ak ba rai Timor-Leste”, dehan Amu Bispo.
Iha selebrasaun aniversáriu ne’e hetan partisipa husi Primeiru Ministru Kay Rala Xanana Gusmão, Vice-PM, MCAS e Ministro do Desenvolvimento Rural e Habilitação Comunitária inklui membru governu konstitusioná da-9 nian balun, Embaixadora Portugal iha Timor-Leste, Manuela Bairos nomós sarani sira husi Dioseze Maliana.
