ME PARTISIPA IHA MISA BA SELEBRASAUN ANIVERSÁRIU DOM BOSCO FUILORO BA DALA 75
Fuiloro, 11/11/2023 – Minista Edukasaun Dra. Dulce de Jesus Soares partisipa iha misa aniversáriu Dom Bosco Fuiloro ba dala 75 hodi agradese ba Maromak kona-ba grasa no di’ak tomak ne’ebé simu durante tinan naruk nia laran.
Iha selebrasaun misa ne’e Amu Bispo Dioseze Baucau Dom Leandro Maria Alves hateten, selebra tinan 75 ne’e bolu ita atu hateke ba kotuk hodi reflete fali misaun ne’ebé durante la’o iha fatin ne’e, tanba sira nia prezensa lori naroman mai rai Timor-Lorosa’e liuliu Lospalos.
“Ita agradese tebes ba misionáriu sira ne’ebé mak ho domin tomak halo sakrifísiu oinoin hodi habelar maromak nia reinu no fó matenek mai ita nia avó sira hodi hatutan mai ita sira ne’e la’os de’it liuhusi fatin formasaun, maibé mós ho meiu sira seluk”, dehan Amu Bispo.
Hafoin misa remata Ministra Edukasaun Dra. Dulce de Jesus Soares hateten, hanesan membru governu konstitusionál da-9 nian fó apoiu tomak ba komunidade saleziana no ba kongragasaun relizióju hotu-hotu, tanba edukasaun hahú husi igraija.
“Hakarak dezafia nafatin ho fiar ne’ebé iha atu komunidade saleziana hatudu nafatin ezamplu di’ak, nune’e fó forsa ba governu hodi iha futuru ba eskola iha fatin ne’e, tanba fatin ne’e istóriku no husi saleziana oras ne’e ema barak mak ukun rai ne’e”, dehan Ministra Edukasaun.
Governante ne’e hatutan, governu konstitusionál da-9 hakerek ona iha programa hodi tau nafatin prioridade ba edukasaun iha eskola estatal sira nomós eskola katólika sira.
