RAEOA, 25/11/2024 - Ministériu Edukasaun, liuhusi Institutu Nasionál Formasaun Dosente no Profisionál Edukasaun (INFORDEPE), Gabinete Avaliasaun no Dezenvolvimentu Kuríkulu no Rekursu Pedagózika (GADKRP), Diresaun Nasionál Sistema Informátika no Teknolojia (DNSIT), partisipa iha feira nasionál ne’ebé loke husi loron 23 to’o 28 fulan-Novembru tinan 2024 ho tema, “Orgullu ba ita-nia identidade no kultura, ita harii futuru liberdade, justisa no esperansa” hodi komemora loron Proklamasaun Independénsia ba dala 49 iha Rejiaun Administrativa Espesiál Oecusse Ambeno (RAEOA).
Iha oportunidade ne’e, Koordenadora Gabinete Formasaunn Profesionál no Kontínua, Sra. Héldera Guteres Corte-real e Silva informa, Ministériu Edukasaun mai partisipa iha feira ida-ne’e tanba, atu selebra aniversáriu ba loron Proklamasaun Independénsia Unilaterál ba dala 49, ne’ebé proklama hosi Francisco Xavier do Amaral.
“Atividade ne’ebé Ministériu Edukasaun liuhusi INFORDEPE, GADKRP, DNSIT mai aprezenta iha ne’e maka hanesan, Quiz ba labarik sira, feira livru ne’ebé kompletu husi livru planu aula ba manorin sira, livru ba alunu klase ida no klase rua iha eskola siklu dahuluk to’o siklu datoluk, loke vídeo Mundu Labarik, Pinta no lee livru”. Tenik Koordenadora GFPK.
Koordenadora ne’e hatutan, tinan 49 ba kotuk, ita-nia estudante no joven sira, ladun hatene istória, maibé ho selebrasaun ida hanesan ne’e, fó hanoin ba joven sira atu sira mós bele hatene istória sira kona-ba prosesu luta ba Timor-Leste nia ukun rasik aan.
Feira ne’e, partisipa másimu husi estudante sira ne’ebé mai husi eskola sira iha Rejiaun Administrativa Espesiál Oecusse Ambeno (RAEOA).
#MédiaME
