MINISTRA EDUKASAUN NO SEKRETÁRIU ESTADU ENSINU SEKUNDÁRIA JERÁL NO ENSINU TÉKNIKA VOKASIONÁL PARTISIPA IHA TOMADA DE POSSE BA PREZIDENTE INFORDEPE FOUN
Dili, segunda 07-08-023- Ministra Edukasaun Dulce de Jesus Soares no Sekretáriu Estadu Ensinu Sekundária Jerál no Ensinu Téknika Vokasionál Domingos Lopes Lemos partisipa iha tomada de posse Prezidente INFORDEPE foun iha Salaun Ian-Martin Matadoru, Dili.
Iha intervensaun ministra edukasaun Dulce de Jesus Soares, hateten dezafia nafatin INFORDEPE atu bele kuda liu tan sira nia sistema formasaun nian atu bele hakat ba dizitalizasaun.
"Iha futuru ami hakarak INFORDEPE bele mós halo formasaun online ruma liuhusi kooperasaun sira seluk, hanesan nasaun Brazil espresa ninia interese hakarak apoiu Ministériu Edukasaun nune’e mós iha pasadu halo ona kooperasaun ho governu Portugés.
Ministériu Edukasaun dadun ne'e koko fila-fali atu haree posibildade ruma atu fó formasaun ba profesór/a sira atu labele abandona estudante no bele akompaña husi online.
Prezidente Emposadu Domingos Martins hateten, prontu atu halo kooperasaun ho ajénsia sira atu bele foku ba formasaun liu-liu kona-ba formasaun, komunikasaun no teknolójia atu bele mellora liu tan manorin na’in sira nia koñesimentu hodi hasa’e kualidade ensinu iha Timor-Leste.
"Pelumenus halo netik buat foun ida atu nune’e foka liu ba área formasaun husi pre-eskolar to’o ensinu sekundáriu ne’e mak sai prioridade, tanba profesór/a sira hamutuk 4 mil mós hein hela formasaun no kapasitasaun husi INFORDEPE to’o nível munisipiu", dehan Prezidente emposadu.
Prezidente ne’e hatutan iha nia madatu buka nafatin kooperasaun ho ajénsia sira atu nafatin fó formasaun no kapasitasaun iha area teknolojia hodi bele hasa’e liu tan kualidade edukasaun iha rai-laran.
