Dili, 16 Janeiru 2023 (SAPIENTIA)-Diretor Administrasaun no Jestaun Finansa Ministeriu Edukasaun, Juventude no Desportu (DJAF-MEJD), Antonino Pires, informa prosesu estudu viabilidade atu harii eskola propriu ba profeosr sira sei konklui iha tinan ida ne’e.
“ita-nia planu halo estudu viabilidade kona-ba planu inplementasaun eskola de exelente ka eskola propriu ba profesor sira-ne’e ho intensaun atu iha futuru bele produs profesor sira ne’ebe iha kualidade hahu kedan hosi baze,” Antoninho Pires hateten ba Sapientia iha nini servisu fatin Vila Verde Dili.
Timor-Leste iha ona instituto Ensinu Superior publiku no privadu sira mak instala ona kursu edukasaun maibe Ministeriu Edukasaun hakarak harii mos eskola propriu duni atu haree oinsa halo preparasaun ida diak ba profesor sira.
Tuir nia, kursu edukasaun ne’ebe maka estabelese iha kada universidade ka instituisaun publiku no privadu ne’e jeral deit, tanba ne’e maka MEJD sei fo prioridade ba profesores selesionadu sira ne’ebe tama iha eskola de exelente ne’e prepara duni atu sai profesor.
“Bainhira ita-nia profesor sira akaba ona hosi eskola exelente ne’e sira preparadu duni atu hanorin hosi nivel edukasaun pre-eskolar ensinu baziku ba to’o iha nivel ensinu sekundariu jeral no tekniku vokasional,” nia hateten.
Estudu viabilidade ne’ebe MEJD halo ne’e. governu prevee orsamentu rihun $250 hodi realiza estudu iha territoriu nasional.
Agora dadaun, nia dehan, MEJD konsege produs ona esbosu preliminar ida no rezultadu sira akontesimentu, tanba antes ne’e peritu sira halo ona komunikasaun ho parte ne’ebe iha konesementu ba informasaun no dadus hodi tulun sira bele halo analiza.
Nune’e, Ministeriu Edukasaun, Juventude no Desportu (MEJD) nia esperansa iha tinan 2023 iha primeiru trimestral ne’e bele hatudu ona ninia rezultadu, atu nune’e ba oin bele iha ona desizaun ruma kona ba instalasaun eskola de exelente ne’e.
Media. Sapientia. Bosco
