MINISTRA EDUKASAUN HETAN VIJITA KORTEJIA HUSI DELEGASAUN SUA ALTEZA PRINSEZA TAILANDIA MAHA CHAKRI SIRINDHRON
Dili, 03/08/2023 – Ministra Edukasaun Dra. Dulce de Jesus Soares hetan vijita kortejia husi delegasaun sua alteza prinseza Tailandia Maha Chacri Sirindhron hodi atualiza progresu servisu ne’ebé durante ne’e halo ona ho governu Timor-Leste.
Iha konferénsia ne’e Ministra Edukasaun Dra. Dulce de Jesus Soares hateten, Ministériu Edukasaun iha previléziu bo’ot hodi bele hola parte iha prémiu ba mellor profesór/a ne’ebé mak selebra husi prinseza nia organizasaun ba nasaun hotu membru ASEAN nian.
"Maske iha iha momentu ne’ebá Timor-Leste seidauk sai membru ASEAN, maybe hetan ona previléjiu bo’ot ida ne’ebé hahú hola parte iha tinan 2015 no prémiu ne’e hala’o kada tinan rua", dehan Ministra Edukasaun.
Governante ne’e hatuir, iha eskola ensinu báziku Matata no ensinu báziku Ermera mak sai modelu ba organizasaun ida ne’e iha futuru atu sai fatin ne’ebé mak nasaun seluk bele mai aprende, maske iha area remota, maibé konsege implementa metodolojia ensinu sentradu ba alunu sira liuhusi utiliza material sira lokal no material resiklajen hodi hanorin estudante sira.
Enkuantu peofesór na’in lima (5) ne’ebé mak hetan ona prémiu sei hetan mós osan dolar $. 10 mil kada ema ida atu uza hodi hala’o atividade iha sira nia eskola ne’ebé hanesan insentiva ida ba Timor-Leste nia profesór/a sira atu bele banati tuir hodi sai professor ida ne’ebé di’ak no mós hetan avalisaun husi organizasaun internasional hanesan organizasaun sua alteza prinseza Maha Chacri Sirindhron nian.
Iha fatin hanesan delegasaun sua alteza prinseza Tailandia Dr. Krissanopong Kritikara dehan, agradese tebes, tanba bele mai vijita Timor-Leste hodi halo reuniaun bo’ot ida husi fundasaun Prinseja Maha Chakei Sirindhron atu atualiza progresu servisu ne’ebé halo ona.
"Kritériu atu sai mellór/a profesór/a simples tebes, tanba poder tomak entrega ba nasaun membru idak-idak atu halo selesaun tuir profesór/a sira nia dezempeñu ne’ebé hanorin estudante sira nomós aprosimasaun ho atividae edukativa sira ne’ebé ho objetivu atu mellora kualidade edukasaun", dehan delegasaun.
Delegasaun ne’e hatutan, iha oportunidade ne’e sei ba vijita mós Eskola Sekundáriu São Miguel Arcanjo Same ne’ebé hanorin husi Profesora Filomena da Costa no Sábadu kontinua vijita Ensinu Báziku Sentrál Baucau ne’ebé hanorin husi profesór Vicente Marchal.
