MINISTRA EDUKASAUN INAGURA ESKOLA ENSINU BÁZIKU FILIÁL OMELAI IHA POSTU ADMINISTRATIVU BOBONARU, MUNISÍPIU BOBONARU
Bobonaru, 25/09/2023 - S.E Ministra Edukasaun hamutuk ho dirijente edukasaun nasionál no munisipál inagura eskola Ensinu Báziku Filiál Omelai, Aldeia Omelai, Suku Molop, Postu Administrativu Bobonaru, Munisípiu Bobonaru ne’ebé mak apoiu husi Fundasaun "Spend it Well" husi Australia.
Iha inagurasaun ne’e Ministra Edukasaun Dra. Dulce de Jesus Soares hateten, Fundasaun "Spend it Well" Australia halo ona eskola hamutuk sanulu resin hitu (17) iha Timor laran tomak inklui EBF Omelai ne’ebé hamutuk sala aula tolu (3) ba estudante hamutuk na'in 117 inklui fasilidade eskola nian hanesan kadeira, meza, kuadru no seluk tan.
“Ita nia parseiru no governu ajuda ita halo eskola, maibé fila-fali ba komunidade edukativa hanesan inan-aman, profesór/a, lider komunitária no hotu-hotu tenki tau esforsu hamutuk hodi kuidadu infrastrutura ne’ebé mak iha no husu ba inan-aman atu halo lutu hodi animal sira labele tama”, dehan Ministra Edukasaun.
Governante ne’e hatutan, programa governu konstitusioná da-9 nian iha área edukasaun iha ona planu atu halo tan eskola hamutuk 1200 tuir orsamentu no prioridade ne’ebé mak iha.
Iha fatin hanesan reprezentante Fundasaun "Spend it Well", Nandy Gum hateten, Fundasaun "Spend it Well" halo ona konstrusaun eskola hamutuk sanulu resin hitu (17) hodi apoiu ba Timor-Leste inklui EBF Omelai, tanba Australia ho Timor-Leste besik liu, nune’e tau importásia hodi apoiu estudante sira liuhusi konstrusaun eskola ne’ebé mak iha.
Eskola EBF Omelai iha profesór no profesora hamutuk na'in 12 inklui permanente na'in tolu (3), kontratadu na'in (6) no voluntáriu na'in (3) no iha serimónia inagurasaun eskola refere hetan partisipasaun husi Prezidente Autoridade Munisípiu Bobonaru, Prezidente NGO MAHON, Autoridade Lokál nomós komunidade suku Molop tomak
