MINISTRA EDUKASAUN HALO VIZITA SUPREZA BA ESKOLA HAAT (4) IHA MUNISÍPIU MANATUTU HODI SELEBRA LORON MUNDIÁL PROFESÓR/A SIRA NIAN
Manatutu, 05/10/2023 – Ministra Edukasaun halo vizita supreza ba eskola EBC Obratu, EBF Kondar, Pré-Eskolá Iliheu no Pré-Eskolár 8 de Setembro Laclo hodi selebra loron mundiál profesór no profesora sira nian hodi fó parabens ba sira nia dedikasaun no esforsu tomak ba edukasaun iha Timor-Leste, vizita ne’e iha Postu Administrativu Laclo, Munisípiu Manatutu, Kinta-feira ne’e.
Iha vizita ne’e Ministra Edukasaun Dra. Dulce de Jesus Soares hateten, loron 5 fulan outubru hanesan loron mundiál ba profesór no profesora sira nian, maske la halo selebrasaun bo’ot, maibé liuhusi vizita ne’e atu hasee de’it manorin sira kona-ba dedikasaun tomak ne’ebé iha ba área edukasaun.
“Hakarak atu hanorin ba estudante sira atu presiza agradese liuhusi hato’o sira nia domin, hato’o sira nia respeitu ba sira nia profesór no profesora sira atu nune’e bele iha komunikasaun di’ak entre manorin no estudante sira”, dehan Ministra Edukasaun.
Iha selebrasaun simples ne’e Ministra Edukasaun Dra. Dulce de Jesus Soares hato’o parabens ba profesór no profesora sira liu-liu ba sira nia dedikasaun, pasiénsia no matetek ne’ebé ajuda eduka ona povu timor nia oan ne’ebé mak sai futuru ba nasaun ne’e.
Governante ne’e akresenta, Governu konstitusionál da-9 liuhusi Ministériu Edukasaun kontinua haree ba nesesidade profesór no profesora sira nian liuhusi hadi’a estatutu inklui mós hadi’a fasilidade eskola, atu sira mós bele hanorin iha kondisaun ida ne’ebé di’ak liu hodi bele garante oan sira nia prosesu aprendizajen ho di’ak liután.
