MINISTRA EDUKASAUN HO WHO KO’ALIA KONA-BA IMPLEMENTASAUN PROGRAMA SAÚDE IHA ESKOLA .
Dili, 08/08/2023 – Ministra Edukasaun Dra. Dulce de Jesus Soares hala’o enkontru ho reprezentante World Health Organization (WHO) hodi ko’alia kona-ba saúde iha eskola liuhusi programa “Lae Ba 5S” mak hanesan hamlaha, lumbringa, infesaun kulit, hemu bebida midar no alkohol, enkontru ne’e hala’o iha Salaun VIP Ministériu Edukasaun, Vila-Verde.
Iha inkontru ne’e Ministra Edukasaun Dra. Dulce de Jesus Soares hateten, iha enkontru ohin Ministériu Edukasaun ho WHO diskuti kona-ba implementasaun programa saúde iha eskola, tanba moras sira ne’e barak liu akontese iha labarik sira ne’ebé sei eskola.
“WHO halo ona atividade sira hanesan lae ba 5S mak hanesan labele iha hamlaha, hases-an husi lumbringa, labele hemu buat ne’ebé mak midar, labele fuma nomós labele hemu tua, entaun programa ida ne’e kapas tebe-tebes ba Ministériu Edukasaun, tanba moras ne’e dalabarak akontese iha labarik sira ne’ebé idade sei eskola”, dehan Ministra Edukasaun.
Governante ne’e hatutan, programa ida ne’e hakarak kontinua ho WHO atu bele halo nafatin intervensaun iha eskola sira hodi bele eduka oan sira atu bele hasees-an husi moras sira ne’ebé mak temi iha programa ne’e rasik.
Iha fatin hanesan reprezentante WHO Dr. Arvind Mathur hateten, senti onradu bo’ot, tanba ohin mai enkontru ho Ministériu Edukasaun hodi ko’alia kona-ba programa ida ho naran “Lae Ba 5S” mak atu haree kona-ba lae ba hamlaha, ba lumbringa, ba infesaun kulit, ba bebida midar no alkohol.
“Programa ne’e iha pontu importante mak kuidadu saúde primária no programa ne’e sei lori ba eskola no foka liu ba labarik sira iha ensinu báziku ho tinan 6 to’o 14 hodi halo intervensaun no halo mós tratamentu ba moras sira ne’ebé infrenta”, dehan reprezentante WHO.
Enkuantu Ministériu Edukasaun ho WHO sei haree atu iha futuru sei halo kooperasaun di’ak liu tan inklui apoiu ba halo revizaun kuríkulu ne’ebé haree liubá saúde, nutrisaun inklui saúde mentál no fíziku nian ne’ebé presiza atualiza iha kuríkulu.
