MINISTRA EDUKASAUN HALO VIZITA FORMSAUN PROGRAMA EDUKASAUN MULTILINGUE .
DILI Kinta-Feira, 10/08/2023 -Ministra Edukasaun Dra. Dulce de Jesus Soares halo vizita kortezia ba formasaun programa Edukasaun Multilingue (EMULI) neebe realiza iha salaun Cathedral Dili, hodi observa no enkoraza manorin sira neebe partisipa iha programa nee.
Ministra Edukasaun Dra. Dulce de Jesus Soares hateten, “kontente tebes tanba iha profesor lubun ida, maka tuir formasaun nee. Sira hotu kontente tebes, maske momentu hahu programa nee susar ba sira, maibe agora sira fiar an, tanba labarik hotu neebe remata husi programa nee sira nia nivel koñesimentu literasia no numerasia diak liu, no ambiente nee modifika los kompara ho uluk, tanba sira hotu komprende katak programa nee diak tebes no ajuda, inan aman barak mos rekoñese programa nee tanba sira hare dezenvolvimento diak iha labarik sira neebe hatene le. Kuaze manorin 10 resin mak ohin partisipa iha programa nee, maske sira la fiar an maibe maioria husi sira kontente tebes uza metodolojia ida nee.
Ministra hatutan, "IX Governu Konstituisional mos sei kontinua apoia no reforsa programa nee ho diak liu tan, iha mos pedidu husi Diretor Eduksaun Manatuto hakarak atu espande programa nee ba iha areas remotas neebe nia identifika, maibe eskola sira nee presiza halo aproximasaun liu husi metodolojia ensinu neebe aplika iha EMULI. Atu espande eskola ida, presiza halo preparasaun diak, presiza manorin neebe iha koñesimentu di’ak oinsa uza metodolojia ida nee, no materiál didátiku sira tenki disponível atu nunee iha prosesu implementasaun labele faillansu”
Manorin Belarmino Beto husi RAEOA, hateten, “ami hanesan implementador iha baze, hau senti kontenti tebes, tanba programa nee kapaz teb-tebes, hau sujere ba dirijente programa ida nee atu kontinua habelar no hatutan formasaun ida nee kada periodu ba manorin hot-hotu no sujere mos ba IX Governu Konstituisional liuliu Ministeriu Edukasaun atu espande programa be eskola sira seluk"
Formadora INFORDEPE Francelina da Costa Laude hateten, "maske susar iha primeiru maibe haree ba manorin sira nia interese no susesu neebé liu husi observasaun pesoal, programa EMULI la hanorin lian materna maibe bele lori labarik sira koñese siénsia iha nível pre-eskolár. Hanesan formadora INFORDEPE, ami apoiu Matematika, Siénsia no mós lian Portugés"
Programa formasaun EMULI nee partisipa husi manorin sira kuaze 40 resin mai husi eskola 10, husi Munisípiu Manatuto, Lautem no RAEOA.
