MINISTRA EDUKASAUN HO CNC DISKUTI KONTINUIDADE BA DEZENVOLVE MATERIÁL BA KURÍKULU IHA ÁREA ISTÓRIA
Dili, 14/08/2023 – Ministra Edukasaun Dra. Dulce de Jesus hala’o enkontru ho Diretór Ezekutivu Centro Nacional Chega!I.P, Hugo Maria Fernandes ho ekipa hodi atualiza servisu ne’ebé halo iha tinan hirak liubá liu-liu fó kontinuidade ba dezenvolve material ba kuríkulu liga ba area istória, enkontru ne’e hala’o iha salaun VIP Ministériu Edukasaun, Vila-Verde.
Iha enkontru ne’e Ministra Edukasaun Dra. Dulce de Jesus Soares hateten, Chega ajuda tebes Ministériu Edukasaun hodi dezenvolve manuál nomós materia didátiku sira no halo mós formasaun ba profesór/a sira liu-liu iha área istória no tenki garante hodi bele implementa konteudu formasaun iha aula laran.
"Ministériu Edukasaun ho Chega identifika ona eskola balun katak iha sala aula sira iha kantinu hodi koloka livru ne’ebé iha referénsia barak ba estudante nomós profesór/a bainhira iha aula sira bele foti livru istória hodi bele lee", dehan Ministra Edukasaun.
Governante ne’e hatutan, Chega mós iha atividade seluk hanesan Chega tour atu estudante sira husi eskola bele ba vijita muzeu no fatin istóriku sira iha Dili laran.
Iha fatin hanesan Diretór Ezekutivu Centro Nacional Chega!I.P Hugo Maria Fernandes hateten, Chega kongratula Ministra Edukasaun ba konfiansa bo’ot kona-ba programa edukasaun nian atu integra kuríkulu ensinu nian.
"Chega mós kontinua formasaun sira hodi dezenvolve materiál didátika sir aba profesór/a sira atu hametin liu tan rede manorin sira nian ita teritóriu laran tomak no halo monitorizasaun atu bele asegura katak manorin na’in sira aplika duni maneira hanorin no aproximasaun ba materiál hodi fó referénsia atu mellora ba futuru", dehan diretór ezekutivu Chega
