MINISTRA EDUKASAUN ENKONTRU HO EKIPA PROGRAMA HANDS HODI DEZENVOLVE PRE-ESKOLAR IHA TIMOR-LESTE
Dili, 14/08/2023 – Ministra Edukasaun Dra. Dulce de Jesus Soares hala’o enkontru ho team lider no ekipa HANDS (halimar, aprende, deskobre no susesu) hodi ko’alia kona-ba dezenvolvimentu pre-eskolar iha rai laran ne’ebé hetan apoiu husi governu Nova-Zelándia, iha salaun VIP Ministériu Edukasaun, Vila-Verde.
Ministra Edukasaun Dra. Dulce de Jesus hateten, kooperasaun servisu ba programa HANDS ne’e hahú iha tinan 2015 atu apoiu dezenvolve pre-eskolar liuhusi formasaun profesór/a sira, apoiu formasaun ba inspetór sira, dezenvolve materiál didátiku inklui mós kria fatin halimar ba estudante sira iha aredór eskola nian.
"Objetivu enkontru ohin mak atualiza programa HANDS mai Ministériu Edukasaun kona-ba programa sira ne’ebé mak halo iha tinan hirak liubá to’o ohin loron atu nune’e ami bele haree fila-fali ba oin ne’e oinsá mak dezenvolve diak liu tan programa ne’e", dehan Ministra.
Governante ne’e hatutan, programa ne’e importante tebe-tebes, tanba ko’alia kona-ba fundasaun edukasaun ne’e importante hodi bele apoiu labarik sira antes tama ba klase ida (1) siklu dahuluk nian.
Iha fatin hanesan team lider Pedro Ximenes hateten, objetivu husi enkontru ne’e mak hakarak suporta kontinua ho komitmentu liuhusi programa HANDS kona-ba lala’ok sira ne’ebé durante ne’e atinji ona no ba futuru bele la’o di’ak liu tan.
"Programa ida ne’e husi tinan 2015 iha momentu ne’e miloens 10 dolar amerikanu no iha tinan 2021 ita bolu HANDS faze segundu no sei to’o iha 2025 portantu osan ne’ebe aloka mós miloens 10 dolar amerikanu no total hamutuk miloens 20 dolar amerikanu", dehan Team Leader.
Iha pre-eskolar tuir atinjimentu prinsipál mak Minisériu Edukasaun ho governu Nova-Zelándia ko’alia ona atu aumenta taxa partisipasaun ne’ebé foufoun ne’e iha 19% no agora sa’e ona ba 30%, nune’e servisu maka’as liutan atu bele atinji 100%.
Enkuantu fatin halimar ne’ebé konstroi ona hamutuk 200 no eskola ne’ebé hetan ona hamutuk 400 no ba oin sei konstroi tan hamutuk ho komunidade sira hodi bele atinji nesesidade ne’ebé iha.
