MINISTRA EDUKASAUN DESIDI SEI HALO ESKOLA IDA IHA ALDEIA ILATBOTE SUKU GOULOLO P.A. CAILACO
Cailaco, 07/10/2023 – Ministra Edukasaun Dra. Dulce de Jesus Soares akompaña husi Diretór Nasionál Infraestrutura Helio Lopes, Administradór Postu Administrativu Cailaco Alfredo Metadao nomós asesora sira husi Ministériu Edukasaun hala’o vizita ba estudante sira iha Aldeia Ilatbote Suku Goulolo hodi haree direta situasaun ne’ebé sira infrenta iha baze.
Iha vizita ne’e Ministra Edukasaun Dra. Dulce de Jesus Soares hateten, disidi hamutuk ona ho Administradór Postu Administrativu Cailaco no Autoridade Lokal sira hodi halo eskola ida iha aldeia Ilatbote, nune’e bele fasilita labarik sira bele asesu ba eskola iha sira nia aldeia rasik.
“Diretór Infrastrutura sei to’o ba tenki halo dezeñu, tenki mai haree fatin no ita hein katak se bele iha anu letivu foun sira pelumenus iha fatin oan ida para sira komesa sira nia prosesu aprendizajen”, dehan Ministra Edukasaun.
Governante ne’e hatutan, karik konstrusaun tinan oin seidauk remata, ko’alia fali ho Xefe Suku atu iha fatin ruma ne’ebé bele uza no Ministériu Edukasaun selu ema hodi ajuda estudante sira aprende dadauk literasia ho numerasia hodi hein konstrusaun remata.
Hafoin remata tiha diskusaun ho komunidade sira, Ministra Edukasaun Dra. Dulce de Jesus Soares hamutuk ho Diretór Nasionál Infraestrtuta Helio Lopes, Administradór Postu Administrativu Cailaco, Autoridade Lokál inklui komunidade tomak Aldeia Ilatbote ba haree kedas fatin ne’ebé atu harii edifísiu eskola foun ba estudante sira.
Enkuantu estudante sira iha Aldeia Ilatbote, Suku Goulolo hamutuk 78 ne’ebé ho tinan tolu to’o sia no entre sira, na’in nen de’it mak ba asesu eskola iha Poetete ho distánsia kilómetru rua tuir informasaun husi komunidade.
