MINISTRA EDUKASAUN HALA’O ENKONTRU HO ESKRITÓR FAMOZU TIMOROAN Sr. LUÍS CARDOSO DE NORONHA "TAKAS"
Dili, 24/08/2023 – Ministra Edukasaun Dra. Dulce de Jesus Soares hamutuk ho Prezidente INFORDEPE Sr. Domingos Martins hala’o enkontru ho Eskritór famozu Timoroan Sr. Luís Cardoso de Noronha "Takas" hanesan manan na’in dahuluk prémiu Oceanu, enkontru ne’e hala’o iha Salaun Enkontru INFORDEPE.
Iha enkontru ne’e Ministra Edukasaun Dra. Dulce de Jesus Soares hateten, Eskritór famozu Sr. Luís Cardoso de Noronha "Takas" hanesan premiadu literatura ne’ebé uza nia matenek hodi hakerek livru sira kona-ba Timor-Leste nomós asuntu global sira seluk nomós durante ne’e hola parte iha luta ba libertasaun nasionál.
"Ministériu Edukasaun sente importante tebes lori Eskritór Timoroan Sr. Luís Cardoso de Noronha atu mai ko’alia ho formadór sira hodi loke liu tan sira nia hanoin oinsá mak bele sai ema ne’ebé dezenvolve literatura Timor-Leste nian", dehan Ministra.
Governante ne’e hatutan, ho prezensa eskritór nian bele motiva timoroan sira liu-liu iha Ministériu Edukasaun ba profrsór/a sira no dirijente sira hotu atu bele sai mós estritór/a iha futuru.
Iha fatin hanesan Eskritór Timoroan Sr. Luís Cardoso de Noronha "Takas" agradese ba Ministériu Edukasaun nia servisu tanba importante tebes hodi fó formasaun nune’e bele prepara foinsa’e sira ho di’ak iha futuru.
"Ha’u sidadaun Timor nian, bainhira Ministériu Edukasaun no profesór/a presiza buat ruma ha’u fó hanesan sidadaun", dehan Eskritór.
