MINISTÉRIU EDUKASAUN HALO INSPESAUN URJENTE BA PROGRAMA MERENDA ESKOLAR IHA EBC FARÓL, DILI

Dili, segunda-feira, 14/08/2023 – Ministériu Edukasaun liuhusi Asesor Gabinete Ministra Edukasaun, akompaña husi Diretór Nasionál Asaun Sosiál Eskolár no Asuntu Sanitária, Xefe Departamentu Merenda Eskolár, Inspetór Eskolár no Diretór Servisu Edukasaun Munisípiu Dili halo inspesaun urjente ba programa merenda eskolár iha eskola Ensinu Báziku Central (EBC) Faról, Dili.

Iha inspesaun ne’e ekipa konvoka enkontru ho dirijente eskola nian atu klarifika informasaun sira ne’ebé fó sai iha média balun iha loron 01 fulan agustu tinan ne’e katak estudante sira lamenta ho ai-han ne’ebé fornese husi koziñeira sira oituan liu.

Hafoin konvoka enkontru ho dirijente eskola ECB Faról katak informasaun ne’ebé fó sai laloos, tanba dalaruma ai-han ne’ebé estudante sira konsumu resin no bazeia ba menú ne’ebé prepara husi edukasaun munisipál no hetan aprovasaun husi Ministériu Saúde.

Enkuantu menú ai-han ne’ebé durante ne’e prepara ba estudante liuhusi merenda eskolár kada loron mak hanean segunda-feira, etu/bifi/modo-tahan no ai-fuan, tersa-feira, etu/ikan halo moellu no modo-tahan, kuarta-feira, etu/manu-tolun da’an ho moellu no modo tahan, kinta-feira, etu/koto da’an no na’an karau, sexta-feira, foremungu da’an/susu-ben no ai-fuan.

Entretantu totál estudante iha Ensino Básico Central Faról hamutuk 2,157 inklui feto hamutuk 1,063 no mane hamutuk 1,094.