Díli - Tersa-feira, 23 abríl 2024
Ministériu Edukasaun liuhusi Asesór Sr. Pedro Ribeiro Gonçalves, akompaña husi Asesora Sra. Jacinta Hanjam Corbafo partisipa iha Kolókiu kona-ba Dokumentu Fraternidade Umana iha Palásiu Prezidente Repúblika hamutuk ho lídere sira husi konfisoins relijiozas oioin.
Iha sorumutu ne'e, Asesór Sr. Pedro Ribeiro Gonçalves aprezenta ba partisipante sira hotu kona-ba oinsá atu integra Dokumentu kona-ba Fraternidade Umana iha Kurríkulu liuliu ho revizaun ba kurríkulu siklu datoluk nian no planu implementasaun inklui diseminasaun ba públiku relasiona ho Dokumentu ne'e rasik liuhusi servisu hamutuk ho Gabinete Prezidénsia Repúblika nian.
Kolókiu ne'e loke husi Xefe Casa Civil Sra. Jesuína Maria Ferreira Gomes no hetan partisipasaun husi ekipa Ministériu Edukasaun, Asesór no funsionáriu sira husi Gabinete Prezidénsia Repúblika inklui reprezentante husi konfisoins relijioza katólika, protestante, musulmanu no entidade relevante sira seluk.
Enkuantu, dokumentu ne'e asina iha tinan 2019 husi Sua Santidade Papa Francisco no husi Imam Boot Al-Azhar Ahmad Al-Tayyeb husu atu hatama valór husi paz, justisa, laran di'ak, furak, fraternidade umana no koezisténsia nian.
#MédiaME
